जातिवादया द्वपं वयेवं ओजिलया संन्यास

आर्सनलया मिडफिल्डर मेसुल ओजिल जर्मनीया राष्ट्रिय टिमपाखें मम्हितेगु घोषणा याःगु दु । ओजिलं छगू वक्तव्य पिथँसें थः टर्कि मूलयाम्ह जूगुलिं फयेमाःगु जातिवाद व अनादरया कारणं संन्यास कायेमाःगु खँ धाःगु दु । ओजिलं निद्वलं मल्याक खँग्वःगु दु वक्तव्य पिथँसें संन्यासया घोषणा याःगु खः ।

थ्व निर्णय यायेत तसकं थाकुगु धासें थःम्हं जर्मनीया जर्सीप्रति गर्व यानागु व उत्साह साथ फिनागु धासें आवंलिं जर्सी मपुनेगु जुइ धाःगु खः ।
विश्वकप स्वयां न्ह्यः ओजिलं लन्डनय् टर्किया राष्ट्रपति रिलेप एर्दोगान नापलाःगु खः । थ्व हे कारणं ओजल आलोचित जुइमाःगु खः । टर्कि मुलयाम्ह जूगुलिं आजिल आलोचित जूगु खः ।

टर्कि मूलयाम्ह हे जर्मन टिमया मेम्ह कासामि इल्काए गेन्डोगा नं राष्ट्रपति एर्दोगानयात नापलाःगु खःसा ओजिल जक आलोचित जूगु खः ।
रसियाय् जूगु विश्वकप जर्मनी समूह चरणं पिहां वयेमाःबलय् ओजिल थप आलोचित जूगु खः ।

‘जर्मनी त्यात धाःसा जि जर्मन, जर्मनी बुत धाःसा जि टर्कि मूल्याम्ह ?’ ओजिलं वक्तव्यय् न्ह्यसः थनातःगु दु ।सन् २०१४ य् विश्वकप त्याकूबलय् ओजिल जर्मन टिमया मू कासामि खः । व न्याक्वः तक जर्मन प्लेयर अफ द इयर नं जुइधुंकल । ओजिलं सन् २००९ निसें जर्मन टिमय् डेब्यु याःगु खः ।