ने. सं. ११४६ बछलागा चौथी -

‘उपत्यका काठ चक्रपथ’या अध्ययन न्ह्यात

प्रदेश ३ या गौरव आयोजना

येँ – प्रदेश नं. ३ या सरकारं स्वनिगःया स्वंगू जिल्ला व स्वीगू प्रदेश निर्वाचन क्षेत्रयात स्वानाः काठमाडौं उपत्यका चक्रपथ दयेकेगुयात प्रदेश गोरवया आयोजना कथं न्ह्यःने न्ह्याकूगु दु । ‘उपत्यका काठ चक्रपथ’या हाकः १३५ किलोमिटर दइगु खँ प्रारम्भिक अध्ययनं क्यंगु दु । मेखे केन्द्र सरकारं नं स्वंगू जिल्ला स्वाइगु ७२ किमि ताःहाकःगु बाहिरि चक्रपथ दयेकेगु खँ न्ह्यःने हयाच्वंगु दु ।

चालु आर्थिक दँय् हे ‘उपत्यका काठ चक्रपथ’या विस्तृत परियोजना दयेकेत छगू करोड २० लाख तका विनियोजन याःगु खः । थ्व चक्रपथ सक्वया शंखरापुर नगरपालिकाया कार्कीगाउँ–कागेश्वरी मनोहरा नगरपालिकाया अधिकारी गाउँ, सातघट्टे–कटुवा–पुँवारगाउँ–फुयाँलगाउँ, गोकर्णेश्वर नगरपालिकाया सुन्दरीजल–नयाँपाटी–पण्डितगाउँ–बालुवा–जगडोल–बुढानिलकण्ठ नगरपालिकाया चुनिखल–चपली–बुढानिलकण्ठ–तोखा–झोर–काभ्रेस्थली–जीतपुर–पाँचमाने भञ्ज्याङ्ग–मुड्खु भञ्ज्याङ–रानीवन–भीमढुंगा–रामकोट– नर्सरि–पुलडोल जुयाः स्युटार पिहां वइ ।

१३५ किमि काठ चक्रपथ मध्ये शंखरापुर नगरपालिकां कागेश्वरी मनोहरा नगरपालिका जुयाः गोकर्णेश्वर नगरपालिका तकया २५ किमिया विस्तृत परियोजना प्रस्ताव (डिपीआर) तयार

अथेहे पुलांगु नैकपा–दहचोक–थानकोट–मातातीर्थ–मच्छेगाउँ–कीर्तिपुर–बो्सन—यलया खोना–ललितघुम्ती–ख्वपया गुण्डु–सुडाल–तेलकोट जुयाः हाकनं येँया पालुवारी–साँखु जुयाः कार्की गामय् स्वाइगु कथं अध्ययन जूगु खँ प्रादेशिक भौतिक पूर्वाधार विकास मन्त्रालयं धाःगु दु ।

प्रारम्भिक अध्ययन कथं १३५ किमि काठ चक्रपथ मध्ये शंखरापुर नगरपालिकां कागेश्वरी मनोहरा नगरपालिका जुयाः गोकर्णेश्वर नगरपालिका तकया २५ किमिया विस्तृत परियोजना प्रस्ताव (डिपीआर) जूगु खँ उगु मन्त्रालयया इन्जिनियर पुण्यराम सुलुं राससयात धयादीगु दु ।

ल्यं दनिगु ११० किमिया लँया निंतिं सम्भाव्यता अध्ययन जुयाच्वंगु जानकारी नं वय्कलं बियादीगु दु ।स्वनिगःया डाँडा जुयाः काठ क्षेत्रयात थियाः चक्रपथ दयेकेगु योजना वि.सं. २०४९ य् हे जिल्ला विकास समितिं न्ह्यःने हःगु खँ प्रदेश सभाया सदस्य रामेश्वर फुँयालं कनादीगु दु । ‘वि.सं. २०४९या न्हापांगु जिल्ला परिषदं थ्व योजना न्ह्यःने हःगु खः ।

तत्कालिन जिविस सभापति चित्रबहादुर केसी, उपसभापति नारायण ढकाल व जि साविक आलापोट गाविसया अध्यक्ष जुयाच्वनाबलय् थ्व चक्रपथया प्रस्ताव यानागु खः । परिषदं पारित याःसां थीथी कारणं थ्व ज्या नह्याः वनेमफुत । प्रदेश सरकारं आः थुकियात प्रदेश गोरवया आयोजना कथं न्ह्यःने न्ह्याकेगु प्रस्ताव वःकथं ज्या जुयाच्वंगु दु’ वय्कलं धयादीगु दु ।

थ्व लँपु दयेकेफत धाःसा स्वनिगःया डाँडाय् दुगु पर्यटकीय क्षेत्रया नं प्रचारप्रसार जुयाः पर्यटन प्रवद्र्धनय् ग्वाहालि जुइगु विश्वास यानातःगु दु ।