राष्ट्र बैंकं नेपाल स्टकया शेयर मीगु

येँ – नेपाल राष्ट्र बैंकं नेपाल स्टकर एक्सचेञ्जय् दुगु थःगु शेयर मीगु जूगु दु । राष्ट्र बैंकं नेपाल स्टकय् दुगु थःगु शेयर लिलाम बढाबढ यानाः मीत्यंगु खः । थुकिया निंतिं राष्ट्र बैंकं मंगलवाः छगू सुचं पिथँगु दु । राष्ट्र बैंकयाके नेपाल स्टकया १७ लाख २९ हजार ९८९ कित्ता शेयर दु ।

राष्ट्र बैंकं स्टकया शेयर न्याये मंदुपिं बैंक, वित्तीय संस्था, धितोपत्र व्यवसायी व सुचीकृत संस्थातय्त भदौ २ गते दुने बैंकया वित्त व्यवस्थापन विभागय् गोप्य शिलबन्दी आवेदन बीत आह्वान याःगु दु । सछि तका अंकित थ्व शेयरया निंतिं राष्ट्र बैंकं प्रति कित्ता शेयरया भाः १ हजार ३२ तका तोके याःगु दु ।

थ्व भाः कथं कूल शेयरया भाः छगू अर्ब ७८ करोड ५३ लाख ४८ हजार ६४६ तका बराबर जूवः । लिलाम बढाबढ जूगुलिं राष्ट्र बैंकं तोके याःगु भाः स्वयां सुनां दकलय् अप्वः बिल वयात शेयर मीगु जुइ । नेप्सेय् सरकारं ५८.६६ प्रतिशत, राष्ट्र बैंकया ३४.६०प्रतिशत, एनआइडीसी क्यापिटल लिमिटेडया ६.१२ व धितोपत्र दलाल व्यवसायीतय् ०.६२ प्रतिशत शेयर दु ।

आः राष्ट्र बंैकया शेयर न्याइपिंसं नेपाल स्टक एक्सचेञ्जय् म्होतिं नं ५ प्रतिशत व अप्वलय् १० प्रतिशत लगानी दइगु ल्याखं आवेदन बीमाः धाःगु दु । शेयर न्यायेगु निंतिं वःगु आवेदन भदौ ४ गते चायेकेगु खँ राष्ट्र बैंकं धाःगु दु ।

राष्ट्र बैंकं छुं ई न्ह्यव हे स्टकया शेयर मीगु घोषणा याना तयेधुंकूगु खः । उबलय् हे सम्पत्ति व शेयर संरचनाया मूल्यांकन नं याःगु खः । थ्व हे आधारय् राष्ट्र बैंकं थःगु स्वामित्वय् दुगु शेयरया भाः क्वःछिउगु खः ।