स्थानीय तह बजार अनुगमनय् कमजोर

येँ (रासस) – कोरोना भाइरसया संक्रमणपाखें बचे जुइत लकडाउन जूगु निलात्या जुइधुंकूसां स्वनिगःया हे उत्तरपूवीृ भेगया स्थानीय तहं बजार अनुगमनयात प्राथमिकताय् तःगु खनेमदु। अनुगमन मजूगुलिं थ्व क्षेत्रय् अत्यावश्यक सामग्रीया भाः थहां वनाच्वंगु दु ।

बजार अनुगमन व नियमन मजूगुलिं छगू हे सामानया भाः पसःपतिकं पानाच्वंगु दु। स्थानीय सरकार सञ्चालन ऐन २०७४ य् प्रत्येक स्थानीय तहय् बजार अनुगमन यानाः मूल्यवृद्धि, कृत्रिम अभाव, हाकुबजाः पनेगु निंतिं ज्या याये दइगु अधिकार बियातःगु दुसां महामारी थेंज्याःगु इलय् तकं थुकियात स्थानीय तहं बेवास्ता याःगु खनेदु। ऐनया परिच्छेद ३ य् गाउँपालिका तथा नगरपालिकाया काम, कर्तव्य व अधिकार अन्तर्गत स्थानीय वस्तुतय् उत्पादन, आपूर्ति तथा निकासी प्रक्षेपण, मूल्य निर्धारण व अनुगमन यायेगु जिम्मेवारी स्थानीय सरकारयात बियातःगु दु ।

कानूनं तोके यानाः बियातःगु कर्तव्य, स्थानीय सरकारं पुरा मयाःगुलिं कोरोनाया महामारीपाखें बचे जुइगु निंतिं आर्यआर्जन मदयेकाः छेँय् हे च्वनाच्वनेमाःगु अवस्थाय् तकं बजारय् लाक्वपाक्व ढंगं भाः थहां वनाच्वंगु खँ गोकर्णेश्वर नगरपालिका ९ अत्तरखेलया स्थानीयवासी माया तामांगं धयादिल ।

बिगमार्टय् मू धलः व बिलया भाः हे फरक
थुगु हे वडाय् च्वंगु बिगमार्ट नांया डिपार्टमेन्टल स्टोरं मू धलखय् छगू भाः च्वयेगु, तर काउन्टरय् ध्यबा कायेबलय् धाःसा अप्वः कायेगु यानाच्वंगु दु। मू धलखय् कागतिया भाः किलोया १२५ तका च्वयातःगु दु, तर काउन्टरया बिलय् धाःसा किलोया १३२ तका वल । ‘छाय् मू धलखय् स्वयां बिलय् भाः अप्वः वल धकाः न्यंबलय् काउन्टरय् च्वंम्हेसिनं जिमिगु सिस्टमय् हे थथे दु धकाः लिसः बिल, अले जिं सामान हे त्वःता वया’ तामाङ्गं कनादीगु दु ।

थ्व बारे जानकारी कायेत नगरपालिकाया उपप्रमुख शान्ति नेपालं तःक्वः हे फोन याःसां फोन तकं मल्ह्वंगु खँ वय्कलं गुनासो यानादीगु दु। बिगमार्टय् सिसाबुसा लिसें दैनिक उपभोग्य व मेमेगु अत्यावश्यक सामानय् नं थथे हे उपभोक्तापाखें अप्वः ध्यबा कायेगु यानाच्वंगु दु ।

बिगमार्ट अत्तरखेलया स्टोर व्यवस्थापक सुशील सुनुवारं मू धलः व बिलय् फरक मू वःगु थःपिनिगु गल्ती जूगु स्वीकार यानादीगु दु। स्वनिगलय् जक बिगमार्टया ४८ गू स्टोर दुगु खँ बजार व्यवस्थापक साजन पौडेलं कनादीगु दु ।

मूल्यवृद्धि गोकर्णेश्वरय् जक मखु लिक्कसं लाःगु कागेश्वरी मनोहरा नगरपालिकाय् नं अथे हे दु। कागेश्वरी मनोहराय् नं अत्यावश्यक सामानय् झितका निसें सछि तका तक भाः थहां वनाच्वंगु खनेदु। लकडाउनया इलय् पेट्रोलियम पदार्थया भाः थहां वंगु मदु। झन् कुहां जक वंगु दु ।

अत्यावश्यक सेवायात माःगु सामानया ढुवानी निर्वाध रुपं जुयाच्वंगु दु। उकिं स्थानीय बजारय् आकाझाकां भाः थहां वनेमाःगु कारण छुं मदु। थुकियात अनुगमन व नियन्त्रण यायेगु कानुनी अधिकार दुगु स्थानीय तह मौन च्वनेगु रहस्यमय जूगु खँ स्थानीय उपभोक्तातय्सं धयाच्वंगु दु ।

बन्दाबन्दी जूगु स्वला दयेत्ययेका तकं स्थानीय
सरकार बजारय् जुयाच्वंगु अनियमितता, मूल्यवृद्धि, कृत्रिम अभाव व हाकुबजाः विरुद्ध मौन जुयाच्वंगु दु। बजारय् यक्व थासय् मू धलः हे दइमखु। मूधलः तयातःगु बजारय् नं सामानया भाः थिकेक कयाच्वंगु दु। स्थानीय सरकार थ्व विषयय् मौन च्वनाबीगुलिं यानाः नं व्यापारीतय् मनोबल थहां वनाच्वंगु उपभोक्तातय् धापू दु ।

सरकारी अनुदान कयातःगु कृषि फर्मय् नं लाक्वपाक्व भाः स्वगुलिं तहया सरकारपाखें कृषिइ अनुदान कयाः थ्व क्षेत्रय् संचालन यानाच्वंगु कृषि फर्म तकं लकडाउनया इलय् तरकारीइ लाक्वपाक्व भाः थकाःगु दु। कागेश्वरी मनोहरा नगरपालिकाया प्रवक्ता राजाराम पुडासैनीं थज्याःगु कृषि फर्मय् तरकारीया भाः तोके मयानागु स्वीकार यानादी ।

छुं न्हि दुने कृषि फार्मया अनुगमन यानाः भाः तोके यायेगु प्रतिबद्धता वय्कलं प्वंकादीगु दु। थ्व क्षेत्रया गोकर्णेश्वर, कागेश्वरी मनोहरा, शंखरापुर, बुढानिलकण्ठ लगायतया नगरपालिका दुने लाःगु थासय् यक्व कृषि फार्म दु। लकडाउनय् स्वनिगः पिनें वःगु तरकारीं कोरोना भाइरस सरे जुइफु धयागु ग्याःचिकुं स्थानीयतय्सं थज्याःगु कृषि फार्मय् वनाः तरकारी न्याःवंबलय् स्वदुगं तक अप्वः भाः कयाहःगु शंखरापुरया उपभोक्ता बिना ढकालं कनादिल ।

बजारय् लाक्वपाक्व भाः काइगुलिं शंखरापुर नगरपालिकाया अवस्था नं उथे हे दु। नगरपालिकाया मूय बजार सक्वय् १० तका निसें १०० तका तक मूल्यवृद्धि जूगु खँ स्थानीय लावण्य सन्देश साप्ताहिक पत्रिकाया सम्पादक पवनलाल श्रेष्ठं धयादिल । नगरपालिकां बजार अनुगमनय् बांलाक ध्यान बीमफुगु खँ वय्कलं कनादिल ।

गोकर्णेश्वर नगरपालिकाया प्रवक्ता कुमार ढुंगानां बजार अनुगमन जुयाच्वंगु दावी यानादीगु दु। वडावडाय् उपभोक्ता मञ्च दयेकाः बजारय् जुइगु अनियमितता पनेगुपहल जुयाच्वंगु वय्कःया धापू दु ।

कानुनी रुपं नगर उपप्रमुखयात अनुगमन समितिया संयोजक दयेकातःगु दु। नगर उपप्रमुख लिपा जुइगु स्थानीय तहया चुनावय् नगरप्रमुखया
दावेदार जुइगु स्वाभाविक खः । नगर क्षेत्रय् बजार अनुगमन यानाः गल्ती याःपिंत कानुनी कारवाहीया दायराय् हल धाःसा वइगु चुनावय् थःपिंत वइगु भोट स्यनीगु अनुमान यानाः उपिं मौन च्वनीगु उपभोक्तातय् विश्लेषण दु ।

स्थानीयस्तरय् डिपार्टमेन्टल स्टोर व बजार चले याइपिनि प्रभाव लाइगु जूगुलिं नगर उपप्रमुखतय्सं नुगः क्वसायेकाः बजार अनुगमन यायेगु मयानाच्वंगु उपभोक्ता अधिकारकर्मी रोशन पोखरेलं धयादिल । थ्व अवस्था स्वनिगः जक मखु देय्न्यंकं दुगु वय्कःया धापू दु ।

सम्बन्धित बुखँ

LEAVE YOUR COMMENTS