नेपाल धितोपत्र बोर्ड तालाबन्दी याःपिंत लाठीचार्ज

येँ – छथ्व लगानीकर्तातय्सं आइतवाः नेपाल धितोपत्र बोर्डया ज्याकुथिइ यानाबिइगु तालाबन्दी प्रहरी हस्तक्षेप लिपा चायेकूगु दु । शेयर बजाः विकासया निंतिं दबाब समूह धयागु छगु पुचलं थीथी ३२ गू माग तयाः आइतवाः ज्याकु चाये न्ह्यः हे बोर्डया ज्याकुथिइ वनाः तालाबन्दी याःगु खः । प्रहरीं तालाबन्दी यानाः धर्नाय् च्वनाच्वंपिं लाठी चार्ज यानाः ख्यानाछ्वःगु खः ।

लाठीचार्ज लिपा प्रहरीं ताचा तछ्यानाः चायेकूगु खः । बोर्डं छथ्वः लगानीकर्तातय् आन्दोलनया कारणं बार्डया ज्याय् प्रभावित जूगु धासें प्रहरीया ग्वाहालि कयाः तालाबन्दी चायेकेमाःगु खँ धाःगु दु । ज्याकुथिइ तालाबन्दी यानाबीवं कर्मचारीत फुक्कं पिने निभाः पानाच्वनेमाःगु खः ।

दबाब समूहं कर्मचारीत दुहां वने न्ह्यव सुथय् १० बजे हे तालाबन्दी याःवंगु खःसां न्हापां थ्यनाच्वंम्ह छम्ह कर्मचारी धाःसा ज्याकू दुने हे लाःगु खः । थ्व दबाब समूहं छुं ई न्ह्यव नं नेपाल स्टक एक्सचेन्ज (नेप्से)य् आमरण अनसन यानाः अर्थमन्त्री युवराज खतिवडा, नेपाल राष्ट्र बैंकया गभर्नर चिरञ्जीवी नेपाल, बोर्डया अध्यक्ष रेवतबहादुर कार्कीपिनिगु राजीनामा माग यानाः नेपाल स्टक एक्सचेन्जय् नं धर्ना च्वंगु खः ।
थ्व पुचःया माग आः व्यावसायिक स्वयां राजनीतिक स्वार्थ पूवंकेत जूगु द्वपं नं वःगु दु ।