‘भारत विद्युत निर्देशिका पुनवरावलोकन यायेत सहमत’

येँ – नेपाः व भारत दथुइ ऊर्जा व्यापार सम्झौताय् लिच्वः लाइकथं भारतीय पक्षं जारी याःगु विद्युत खरिद निर्देशिकायात पुनरावलोकन यायेत भारत तयार जूगु दु । प्रधानमन्त्री केपी ओलीं भारतीय समकक्षीलिसे जूगु मंकाः पत्रकार सम्मेलनय् भारत खरिद निर्देशिका पुनरावलोकन यायेत भारत तयार जूगु जानकारी बियादीगु खः ।

नेपाः भ्रमणय् वयाच्वनादीम्ह भारतीय समकक्षी नरेन्द्र मोदीलिसे जूगु याकःयाकः व निगू देशया प्रतिनिधिमण्डल सहित जूगु वार्ता लिपा भारत पुनरावलोकन यायेत तयार जूगु खँ धाःगु दु ।

सन् २०१६ या अन्त्यपाखे हःगु उगु निर्देशिका संशोधन यायेत नेपालं उबलय् निसें हे भारतयात इनाप याना वयाच्वंगु खः । नेपाः व भारतया प्रधानमन्त्री तहय् शुक्रवाः जूगु सहलहय् थ्व विषयय् खँ जूगु खः ।

भारतलिसे सन् २०१४ य् विद्युत व्यापार सम्झौता जुइधुंकाः नेपालं जलविद्युत क्षेत्रय् अन्तर्राष्ट्रिय लगानी दुतहयेगु योजना दयेकूगु खः । तर थ्वयां छुं ई लिपा हे भारतं सरकारी कम्पनी वा भारतीय कम्पनीया ५१ प्रतिशत लगानी मदुगु विद्युत परियोजनाया उत्पादन न्याना मकायेगु कथं निर्देशिका हयाबिउगु खः । थ्व निर्देशिकां यानाः मेमेगु देय् नेपाःया जलविद्युतय् लगानी यायेत निरुत्साहित जूवंगु खः ।
नेपालं थ्व विद्युत निर्देशिकाया थ्व प्रावधान संशोधन यायेत उबलय् निसें हे इनाप यानाच्वंगु खःसा आः भारतीय प्रधानमन्त्रीया नेपाः भ्रमणया इलय् जक थुकी पुनरावलोकन यायेत सहमत जूगु खः ।

प्रधानमन्त्री केपी ओलीं मोदी लिसे जूगु संयुक्त पत्रकार सम्मेलनय् न्ववानादिसें धयादीगु दु, ‘जिमिगु ध्यान निगू देय् दथदुइ हस्ताक्षर जूगु ऊर्जा व्यापार सम्झौता पूवंक कार्यान्वयन जुइमा धयागु खँय् केन्द्रीत जुइत आवश्यक दु । सीमापार ऊर्जा व्यापारसम्बन्धी निर्देशिकाया समीक्षा यायेत भारतं याःगु कुतःया प्रसंश याना ।’ तर मंकाः पत्रकार सम्मेलनय् भारतीय प्रधानमन्त्री नरेन्द्र मोदीं निगू देय् दथुइ जूगु थीथी समझदारीया बारे जानकारी बियादीसां विद्युत खरिद निर्देशिकाया बारे धाःसा न्ववानामदी । भारतं हःगु उगु निर्देशिका नेपाःया जलविद्युतय् गैरभारतीय लगानी दुहां मवयेमा धकाः हे हःगु खँ विज्ञतय्सं धायेगु यानाच्वंगु दु ।

थौंकन्हय् नेपालय् थीथी जलविद्युत आयोजना दयेकाच्वंगु ल्याखं छुं दँ लिपा नेपालं भारतयात मत मीफइगु अवस्था जुइ ।