ने. सं. ११४३ चौलाथ्व तृतीया -

अमेरिका–चीन व्यापार युद्ध,विश्वया लाकां कम्पनीपाखें दिकेत इनाप

विश्वया तःधंगु लाकां कम्पनीतय्सं अमेरिकायात चीनलिसेया व्यापार युद्ध दिकेत आह्वान याःगु दु । लाकां कम्पनीत नाइक व एडिडासलिसें मेमेगु कम्पनीतय्सं थ्व व्यापार युद्धं उपभोक्तातय्त बज्रपात जुइगु ख्याच्वः बिसें अमेरिकी राष्ट्रपति डोनाल्ड ट्रम्पयात चीनलिसेया व्यापार युद्ध अन्त यायेत आह्वान याःगु खः ।

सछि व ७० गू कम्पनीतय्सं हस्ताक्षर यानाः बिउगु निवेदनय् राष्ट्रपति ट्रम्पं आयात शुल्क २५ प्रतिशत अप्वयेकूगुलिं असमानुपातिक रुपं क्वय्या वर्गया मनूतय्त नोक्सान जुइगु खँ धयातःगु दु । ‘थ्व व्यापार युद्ध अन्त यायेगु ई वःगु दु’ उमिसं निवेदनय् धयातःगु दु ।वंगु वालय् जक राष्ट्रपति ट्रम्पं निसः अर्ब डलर बराबरया चिनियाँ सामान कया वयाच्वंगु आयात शुल्क १० प्रतिशतं अप्वयेकाः २५ प्रतिशत याःगु खः ।

चीनं थुकिया प्रतिक्रिया कथं ६० अर्ब डलर बराबरया अमेरिकी सामानय् वइगु जुन १ निसें आयात शुल्क अप्वयेकेगु धायेधुंकूगु दु ।
अमेरिकी राष्ट्रपतियात बिउगु निवेदनय् लाकां कम्पनीत क्लाक्र्स, डक्टर मार्टेन, कन्भर्सं थेंज्याःगु लाकां कम्पनीतय्सं नं हस्ताक्षर यानातःगु दु ।

उमिगु कथं थौंकन्हय् लाकामय् अमेरिकां अप्वयेकू शुल्क औसतय् ११.३ प्रतिशत दुसा गुगुं गुगुं लाकामय् ला ६७.५ प्रतिशत तक दु । ‘थ्व शुल्कय् थप २५ प्रतिशत शुल्क काल धाःसा अमेरिकी परिवारं लाकमय् शतप्रतिशत भन्सार शुल्क पुलेमाली’ कम्पनीतय्सं धाःगु दु ।वंगु महिनाय् ट्रम्पं थज्याःगु कम्पनीतय्त थःपिनि खर्च कटौती यायेत व उत्पादन ज्या अमेरिकाय् हे लित हयेत सुझाव बिउगु खः ।

तर लाकां दयेकीगु कम्पनी व खुद्रा विक्रेतातय्सं आःया अमेरिकी नीति ठीक मजू धाःगु दु । उमिसं धाःगु दु ‘लाकां दयेकेगु उद्योग तसकं अप्वः पुँजी माःगु उद्योग खः । थुकिया निंतिं तःदँया योजना आवश्यक जुइ । थज्याःगु परिवर्तन वयेवं कम्पनीतय्सं थःपिनि फ्याक्ट्री तुरुन्त सारे यायेफइमखु ।’