ने. सं. ११४४ कौलाथ्व षष्ठी -

युएई आममाफीं १ हजार स्वयां अप्वः नेपाः लिहां वल

येँ – युएई सरकारं देशय् दुपिं अवैधानिक ज्यामियात वैध जुइत बिउगु आममाफी योजनाया ई हाकनं लछि थप याःगु दु । आः थज्याःपिं ज्यामितय्सं जनवरी २ तक ई थप जूगु दु । युएईया राष्ट्रिय दिवशया अवसरय् डिसेम्बर २ निसे लागू जुइगु कथं आममाफी हाकनं लछि थप यानागु खँ युएईया सञ्चार माध्यमं धाःगु दु ।

न्हापा बिउगु स्वलाया म्याद अक्टोबर ३० सं फइधुंकूगु दु वयां लिपा थप याःगु लछिया ई नं मंसिर १ गते फइधुंकूगु दु । वंगु साउन १६ गते निसें मंसिर १ गते तक बिउगु आममाफी प्रक्रियापाखें १ हजार स्वयां अप्वः नेपाःमि छेँय् लिहां वःगु दुसा अप्वःस्यां धाःगाु वैध जुयाः अन हे ज्या यायेगु इच्छा प्वंकूगु दु ।

दूतावासपाखें १४५ म्हेसिनं राजधानी दयेकूगु दु । उपिं मध्ये अप्वःस्यां जागिर मालेगु प्रयोजनया निंतिं खुलाया भिसा लगेजूगु दु । अथेहे १८८ म्हेस्यां ट्राभल डकुमेन्ट दयेकाः नेपाल लिहां वयेधुंकूगु दूतावासया राहदानी फाँटय् सचिव केशवराज पोखरेलं कनादीगु दु । वय्कःया कथं आममाफी प्रक्रियाय् सहभागी जूपिं मध्ये मिजंत स्वयां नं मिसातय्गु ल्या अप्वः दुगु खँ दूतावासं धाःगु दु ।

तर पूर्ण रुपं तथ्यांक धाःसा पिहां मवनिगु खँ धाःगु दु । युएई सरकारं अवैधानिक बसोबास यानाच्वंपिं नेपाःमि सहित थीथी देय्या ज्यामियात वैधानिक जुइत माःगु कानुनी प्रक्रिया पूवंकाः थःगु देशय् लिहां वनेत इनाप याःगु दु ।

भिजिट भिषाय् वयाः ओभर स्टे च्वनाच्वंपिं, घरेलु मिसा ज्यामि, दथुइ ज्या मालाः च्वनिपिं व राहदानी मदयाः अवैधानिक जूपिं नेपाःमि आममाफी प्रक्रियाय् ब्वति काःगु खँ धाःगु दु । स्वदेश लिहां वइपिं ज्यामियात दूतावासं सहजीकरण याःगु खँ धाःगु दु । आममाफी प्रक्रिया ब्वति कयाः स्वदेश लिहां वःपिं भविष्यय् हाकनं युएई वनाः ज्या यायेफइगु खँ धाःगु दु ।