थनिंनिसें मध्य भोटेकोशीया शेयर

येँ – मध्यभोटेकोशी जलविद्युत कम्पनीं थनिंनिसें साधारण शेयर पितबिउगु दु । कम्पनीं छगू अर्ब ४४ करोड तका बराबरया १४ करोड ४० लाख कित्ता सीमित साधारण शेयर पितबिउगु खः । साधारण शेयरया निंतिं वइगु मंसिर १४ गते तक आवेदन बीफइगु खँ धाःगु दु ।
कम्पनीं संस्थापक संगठीत संस्थाया कर्मचारी व ऋणदाता संस्थाया कर्मचारीतय् निंतिं धाःसा मंसिर १८ निसें २६ तक तकया आवेदन बीफइ कथं शेयर निष्काशन यायेत्यंगु दु ।

कम्पनीं कर्मचारी संचय कोषया संचयकर्तातय् निंतिं छगू करोड १७ लाख कित्ता, संस्थापक संगठीत संस्थाया कर्मचारीतय् निंतिं २१ लाख कित्ता व ऋणदाता संस्थाया कर्मचारीतय् निंतिं खुगू लाख कित्ता शेयर पितबीत्यंगु खः । थुकी संचयकोषया संचयकर्तातय्सं ५० कित्ता निसें ५०० कित्ता तक आवेदन बी दइसा कोषया कर्मचारीतय्सं ५० कित्ता निसें १२०० कित्ता तक आवेदन बीदइ ।

कम्पनीं सिन्धुपाल्चोक जिल्लाय् १०२ मेगावाट क्षमताया मध्य भोटेकोशी जलविद्युत आयोजना दयेकाच्वंगु दु । थ्व कम्पनीया अधिकृत पूँजी खुगू अर्ब २१ करोड दुसा जारी पूँजी खुगू अर्ब दु । कम्पनीया जारी पुँजीइ ५१ प्रतिशत शेयर स्वामित्व नेपाल विद्युत प्राधिकरण, चिलिमे जलविद्युत कम्पनी लगायतयागु दु ।

कम्पनीइ प्राधिकरणया १० प्रतिशत, चिलिमेया ३७ प्रतिशत, सिन्धुपाल्चोक हाइड्रो पावर कम्पनी, नेपाल अरनिको हाइड्रोपावर कम्पनी, सिन्धु इन्भेस्टमेन्ट कम्पनी व सिन्धु भोटेकोशी हाइड्रोपावर लिमिटेडया छगू छगू प्रतिशत शेयर स्वामित्व दु ।