कुवतेयात ८ विकेटं बुकूसां नेपाः विश्वकपं पिने

नेपाः सन् २०२०य् जुइगु यु—१९ विश्वकप म्हितेमखनीगु जूगु दु । अन्तिम कासाय् कुवेतयात ८ विकेटं बुकूसां नेपाल छनोट जुइमफुगु खः । छनोटया मेगु कासाय् युएइं ओमानयात १० विकेटं बुकेवं नेपाःया विश्वकप म्हितेगु म्हगस क्वचाःगु खः । युएइ अपराजित जुयाः विश्वकपया निंतिं छनोट जूगु खः ।

नेपाः थःगु निगूगु कासा वां प्रभावित जुइवं डकवर्थ लुइसया आधार युएइनाप मुक्कं छगू रनं बुइवं विश्वकप छनोटय् बाधक जूगु खः । उगु कासाय् नेपालं युएइयात २४८ रनया लक्ष्य बिउगु खःसां युएइ ३० ओभरय् स्वंगू विकेटया क्षतिइ १२२ रन दयेकूबलय् वा वःगु खः । नेपाः छनोटय् डकवर्थ लुइसया आधारय् छगू कासाय् जक बूगु खः, मेगु फुक्क कासा तःधंगु अन्तर त्याःगु खः ।

अथे खःसां थ्व धेंधेंबल्लाखं छगू जक टिम विश्वकपया निंतिं छनोट जुइगु जूगुलिं नेपाः अभागी जुल । निदय्ँ छक्व जुइगु थ्व धेंधेंबल्लाखय् नेपाः सन् २००० निसे २००८ तक झ्वलाक न्याक्वः तक छनोट जूगु खःसा सन् २०१२ व २०१६ य् नं छनोट जूगु खः । थ्व लिपा सन् २०१८या निंतिं छनोट मजूगु नेपाः २०२० य् जुइत्यंगु विश्वकपय् नं छनोट जुइमफुत ।

छनोटया अन्तिम कासाय् कुवेतयात बुकेगु झ्वलय् १५८ रनया लक्ष्य ज्वनावःगु नेपालं २८ ओभरय् निगू विकेटया क्षति पूवंकूगु खः । नेपाःया निंतिं रित गौतमं ६२, पवन सरार्फ ५३, आसिफ शेखं ३३ व सन्दिप जोरा ५ रन दयेकूगु खः । नेपाःया निंतिं कप्तान रोहित कुमार पौडेलं स्वंगू विकेट काःगु खः । अथेहे रासिद खान, सूर्य तामाङ व कुशल मल्लं निगू निगू विकेट काःगु खः ।