लियोनल मेसी पीएसजीइ अनुबन्धित
एजेन्सी- अर्जेन्टिनाया कप्तान लियोनल मेसी फ्रेन्च क्लब पेरिस सेन्ट जर्मेन (पीएसजी)य् अनुबन्धित जूगु दु । मेसीं मंगलवाः पीएसजीलिसे निदँयागु सम्झौता याःगु खः । अथे हे निदँ लिपा नं पीएसजीइ हे च्वनेगु विकल्प नं सम्झौताय् दु ।
मेसीं पीएसजीइ ३० नम्बरयागु जर्सी फिना म्हिती । मचां निसें बार्सिलोनां म्हिता वःम्ह मेसीं आः नं बार्सिलोनाय् हे च्वनेगु तयारी याःगु खःसां ला लिगायागु आर्थिक नियमया कारणं क्लबलिसे सम्झौता नवीकरण जुइमफुत ।
पीएसजीइ थःगु करियरया न्हूगु अध्याय शुरु जुइत्यंगु धासें मेसीं क्लबया आज्जु व थःगु महत्वाकांक्षा ज्वःलाःगुलिं न्हूगु अध्याय शुरु यायेत थः अधैर्य व उत्सुक जूगु धाःगु दु । ‘क्लबया निंतिं म्हितेत आः अधिर दु’ धासें मेसीं थःके पीएसजीया कासामि व स्टाफया क्षमताया बारे जानकारी दुगु व क्लबलिसे जानाः तःधंगु उपलब्धी चूलाकेत प्रतिबद्ध जुयागु धाःगु दु ।
पीएसजीया अध्यक्ष नासेर अल खलैफीं मेसीयात क्लबय् हयेफुगुलिं थः तसकं लय्ताया धासें मेसीयात पीएसजीइ लसकुस यायेखंगुलिं थःपिं गौरवान्वित जूगु नं धाःगु दु ।
पीएसजीइ आः फ्रान्सया स्टार कासामि किलिएन एमबाप्पे व ब्राजिलया स्टार कासामिं नेयमार लिसे अर्जेन्टिनाया स्टार कासामि लियोनल मेसी अटाय्किङ लाइनं म्हितीगु जुइ । थुकियात विश्वया हे दकलय् उत्कृष्ट अटाय्किङ लाइन धायेगु शुरु जुइ धुंकूगु दु । थ्व स्वम्ह कासामिया ‘ट्रायो’यात ‘एमएमएन’(मेसी, एमबाप्पे व नेयमार ) नां बिउगु दु ।
LEAVE YOUR COMMENTS