इरान विश्वकपय् छनोट, अर्जेन्टिना त्यात, ब्राजिल बराबरीइ

एजेन्सी- इरान आकिवं कतारय् जुइगु विश्वकप फुटबलय् म्हितेत छनौट जूगु न्हापांग्ु एशियाली देय् जूगु दु । मेखे दक्षिण अमेरिकापाखेया विश्वकप छनोट कासाय् शुक्रवाः अर्जेन्टिनां चिलीयात बुकूगु दु । कतारय् जुइगु विश्वकपया निंतिं छनोट जुइधुंकूगु अर्जेन्टिनां चिलीयात २–१ गोलं बुकूगु खः ।

अर्जेन्टिनाया निंतिं एन्जेल डि मारियां कासाया १० औ मिनेटय् व लाउटरो मार्टिनेज कासाया ३४ औं मिनेटय् छगू छगू गोल याःगु खः । चिलीया निंतिं कासाया २० औं मिनेटय् बेन डियाजं गोल याःगु खः । अर्जेन्टिना पुचःया निगूगु थासय् दुसा चिली न्ह्यगूगु थासय् दु ।

शुक्रवाः हे जूगु मेगु छनोट कासाय् शीर्ष थासय् लानाच्वंगु ब्राजिलं पुचःया स्वंगूगु थासय् च्वंगु इक्वेडरलिसे बराबरी म्हितल । ब्राजिलं इक्वेडरलिसें १–१ गोलया बराबरीइ म्हितूगु खः । कासाया खुगू मिनेटय् हे ब्राजिलया क्यासिमिरों गोल याःगु खःसा कासाया ७५ औै मिनेटय् इक्वेडरया फेलिक्स टोेरेस बराबरी गोल याःगु खः । कासाय् इक्वेडरया एलेक्सजेण्डर डोमिनुएज व ब्राजिलया इमर्सन रोयलं रेड कार्ड नःगु खः ।

अथेहे शुक्रवाः जूगु मेगु कासाय् उरुग्वें पाराग्वेयात १–० गोल बुकल । उरुग्वेया निंतिं लुइस सुआरेजं गोल याःगु खः । उरुग्वे पुचःया प्यंगूगु थासय् दु ।

विश्वकप एसियाली छनोट अन्तर्गत बिहिवाः जूगु कासाय् इरानं इराकयात बुकाः विश्वकपया निंतिं छनोट जूगु दु । इरानं इराकयात १–० गोलं बुकाः झ्वलाकः स्वकःखुसी विश्वकपय् छनोट जूगु खः । इरानया निंतिं मेहदी तारेमी कासाया निगूगु हाफय् गोल याःगु खः ।