कलहया दथुइ स्पेन मिस्तय् विश्वकप फुटबल च्याम्पियन

एजेन्सी- कप्तान ओल्गा कारमोनां याःगु छगू जक गोलया ग्वाहालिं स्पेन मिस्तय् विश्वकप फुटबल च्याम्पियन जूगु दु । इंग्ल्यान्डविरुद्ध आइतवाः जूगु कासाय् स्पेनयात च्याम्पियन दयेकेगु निंतिं कप्तान ओल्गा कासाया २९ औं मिनेटय् गोल याःगु खः । इंग्ल्याण्डया कासामिपाखे लाकाहःगु बल लङ्ग पासय् मोरिओना कालडेन्टेयात वःगु कालडेन्टें मिले यानाबिउगु पासय् डिफेन्डर ओल्गा ओपरल्यापय् वयाः याउँक गोल यानाबिउगु खः ।

कासाया १६ औं मिनेटय् हे इंग्ल्यान्डयात अग्रता कायेगु ह्वःताः वःगु खः, तर लौरेन हेम्पं याःगु प्रहार क्रसबारय् न्यानाः लिहां वयेवं इंग्ल्यान्डया भाग्य त्वाःदःगु खः । थ्वयां छगू मिनेट लिपा हे स्पेनया अल्वा रेडोन्डों सतिकं याःगु प्रहारयात इंग्ल्यान्डया गोलकिपर मारी अर्पसं बचे याःगु खः । कासाया ६९ औं मिनेटय् स्पेनयात पेनाल्टिया ह्वःताः वःगु खः । तर जेनी हार्मोसं थ्वाःगु पेनाल्टियात इंग्ल्यान्डया किपरं बचे यानाबिल ।

निगूगु हाफय् तसकं प्रतिस्पर्धात्मक जूगु कासाय् निगुलिं टिमं गोल यायेमफयेवं स्पेन न्हापांखुसी विश्वकप विजेता जूगु खः । इंग्ल्यान्ड नं न्हापांखुसी विश्वकपया फाइनलय् थ्यंगु खः । इंग्ल्यान्डया सिनियर टिमयात सन् १९६६ लिपा विश्व विजेता जुइगु ह्वःताः वःगु खः, तर थ्व पालय् नं इंग्ल्याण्ड असफल जूगु दु । सन् १९६६ इंग्ल्यान्डं मिजंतय् विश्वकप त्याकेधुंकाः आःतक सिनियर टिमय् छुं नं कासाय् विश्वच्याम्पियन जुइफुगु मदुनि ।

स्पेन मिस्तय् विश्वकप त्याकूगु न्यागूगु देय् जूगु दु । आःतक जूगु गुंगू विश्वकप मध्ये अमेरिकां प्यक्वः, जर्मनीं निक्वः व नर्वे व जापानं छक्वः छक्वः त्याकेधुंकूगु दु ।

अस्थिरता, कलह व समूह चरणय् जापानपाखें ४–० गोलं पारजित जूसां उत्कृष्ट पुनरागमन यासें स्पेनया मिस्तय् टिम विश्वविजेता जुइत ताःलाःगु खः । स्वक्वःखुसी विश्वकप फुटबल म्हिताच्वंगु स्पेनया कासामि व प्रशिक्षक दथुइ ल्वापु जुयाच्वंगु खँ सार्वजनिक जुयाच्वंगु दु । अथेहे खःसां स्विट्जरल्यान्ड, नेदरल्यान्ड व स्वीडेनयात बुकसें स्पेन फाइनलय् थ्यंगु खः ।

स्पेन टिमय् दुथ्याःपि. अप्वः धयाथें कासामि च्याम्पियन्स लिग बजेता बार्सिलोनां म्हितीपिं खः ।