रियल उपाधिपाखे उन्मुख

म्याड्रिड (एजेन्सी) कप्तान सर्जियो रामोसं कासाया अन्त्यपाखे पेनाल्टीं या:गु गोलया ग्वाहालिं रियल म्याड्रिड बिहीवा: स्पेनी ला लिगाय् गेटाफेयात १-० बुकल । थ्व कासा त्यायेवं रियलं लिगय् दकलय् च्वय् प्यंगू ल्या:या अग्रता का:गु दु । लिगय् रियलया थ्व झ्वलाक खुक्व:गु जित ख: । रामोसं कासाया ७९ मिनेटय् गोल या:गु ख: ।

बार्सिलानां थ्वयां न्ह्य: एटलेटिको म्याड्रिडनाप बराबरी म्हितेवं रियलयात अपूगु ख: । रियलया ७४ ल्या: जूगु दु, अले लिगय् न्यागू चरणया कासा जक ल्यं दूगु स्थितिइ जिनेदिन जिदानया टिम उपाधिपाखे उन्मुख जूगु दु ।

इटाली
मिलान – इटालीया सिरी ए बिहीवा: एटलान्टां नेपोलीयात २-० बुकल व मेगु सिजन युरोपेली च्याम्पियन्स लिग म्हितेगु सम्भावना बल्ला:गु दु । वया नितिं मारियो पासालिच व रोबिन जासेन्सं गोल यात । मेगु कासाय् युडिनेजीं रोमायात २-० बुकल ।

इंग्ल्यान्ड
लन्डन – इंग्लिस प्रिमियर लिगय् म्यानचेस्टर सिटीं बिहीवा: नकतिनि इंग्लिस प्रिमियर लिग च्याम्पियन जूगु लिभरपुलयात ४-० बुकल । सिटीया तिनिं केभिन डे ब्रुन, रहिम स्टर्लिङ व फिल फोडेनं गोल यात । मेगु गोल एलेक्स ओक्सलेड च्याम्बरलिनपाखें आत्मघाती जुल । मेगु कासया सेफिल्ड युनाइटेडं टोटनहमयात ३-१ बुकल ।