आरसिटी बी डिभिजन च्याम्पियन

येँ – शहीद स्मारक बी डिभिजन लिगया उपाधि रानी पोखरी टिम (आरसीटीं) त्याकूगु दु । सातदोबाटोया एन्फा मैदानय् जूगु अन्तिम चरणया कासाय् श्री भगवतीयात १—० गोलं बुकाः आरसीटीं उपाधि त्याकूगु खः । आरसीटीया निंतिं कासाया २५ औं मिनेटय् लोकेन्द्रबहादुर कार्कीं छगू जक गोल याःगु खः । बी डिभिजन लिगया उपाधि लिसें आरसीटीं ८ लाख तका नगद नं त्याकल ।

लिग त्याकूसां आरसीटी ए डिभिजनय् धाःसा वने खनीमखु । थुगुसी जूगुु शहिद स्मारक ए डिभिजन लिगय् रेलिगेशन मजूगुलिं आरसीटी च्याम्पियन जूसा ए डिभिजनय् वने मखंगु खः ।लिगया उपविजेता श्री भगवतीयात ५ लाख, स्वंगूगु थासय् लाःगुु टुसाल युथ क्लबयात ३ लाख व प्यंगूगु थासय् लाःगु सातदोबाटो युथ क्लबयात २ लाख नगद बिउगु खः ।

बी डिभिजन लिगय् १२ गू क्लबं ब्वति काःगु खः । लिगय् आरसिटी, श्री भगवती, टुसाल युथ क्लब, सातदोबाटो युथ क्लब, नयाँ बस्ती युवा क्लब, ब्वाइज युनियन, पुल्चोक, मध्यपुर युथ एसोसिएसन, झम्सिखेल युवा क्लब व खुमलटार युवा क्लब ब्वति काःगु खः ।

सम्बन्धित बुखँ

LEAVE YOUR COMMENTS