बार्सिलोना व आयाक्स सेमिफाइनलय्, रोनाल्डोया यात्रा क्वचाल

बार्सिलोना व आयाक्स च्यापियन्स लिगया सेमिफाइनलय् थ्यंगु दु । च्याम्पियन्स लिगया क्वार्टरफाइनलय् बार्सिलोनां म्यानचेस्टर युनाइटेडयात व आयाक्सं युभेन्टसयात बुकाः अन्तिम प्यंगू थासय् थाय् दयेकूगु खः।क्वाटरफाइनलया निगूगु लेग अन्तर्गत जूगु कासाय् बार्सिलोना म्यानचेस्टरयात ३–० गोलं बुकूगु खः ।

क्वार्टरफाइनलया न्हापांगु लेगय् नं म्यानचेस्टरयात १–० गोलं बुकूगु बार्सिलोना समग्रय् ४–० गोलं कासा त्याकाः सेमिफाइनलय् दुहां वंगु खः । बार्साया घरेलु मैदान नाउ क्याम्पय् कासाय् कप्तान लियोनल मेसीं निगू व फिलिप काउन्टिन्हो छगू गोल यात । मेसीं न्हापांगु हाफया १६ औं व २० औं मिनेटय् गोल याःगु खः ।

कासाया १६ औं मिनेटय् मेसीं बांलाःगु कासा न्ह्यब्वसें २० यार्ड तापाकं गोल याःगु खः । थ्वयां प्यंगू मिनेट लिपा हे म्यानचेस्टरया गोलकिपर डेभिड डि गियाया गल्तीइ बार्सां मेगु गोेल यात । निगूगु हाफय् बार्सिलोनाया निंतिं काउन्टिन्हो मेगु छगू गोल याःगु खः । कासाया ११ औं मिनेटय् बार्सिलोनायात पेनाल्टीया अवसर वःगु जूसां भिएआर स्वयाः पेनाल्टी मजूगु निर्णय याःगु खः ।

बार्सिलोना विरुद्ध युनाइटेडं कासाय् बांलाःगु प्रर्दशन यायेमफुत । युनाइटेडया निंतिं ४० औं सेकेण्डय् मार्कोस रासफोर्डं याःगु प्रहार बारय् लानाः लिहा वःगु खःसा ९० औं मिनेटय् साञ्चेजं याःगु बांलाःगु प्रहार बार्साया गोलकिपरं पनाबिल । बार्सिलोना प्यदँ लिपा च्याम्पिन्स लिगया सेमिफाइनलय् थ्यंगु खः ।

सन् २०१५ य् बार्सिलोना सेमिफाइनलय् थ्यंबलय् च्याम्पियन्स लिगया उपाधी नं त्याकूगु खः।मेगु क्वाटरफाइनल कासाय् उत्कृष्ट कासा म्हिताः डच क्लब आयाक्स सन् १९९७ लिपा न्हापांखुसी सेमिफाइनल थ्यंगु दु । आयाक्स इटालियन सिरि ए या शीर्ष थासय् च्वंगु युभेन्टसयात २–१ गोलं बुकूगु खः ।

क्वाटरफाइनलया न्हापांगु लेगय् १–१ गोलया बराबरी म्हितूगु आयाक्सं समग्रय् ३–२ गोलं कासा त्याकाः सेमिफाइनलय् प्रवेश याःगु खः । युभेन्टसया मैदानय् जूगु कासाय् स्टार कासामि क्रिष्टियानो रोनाल्डों कासाया २८ औ मिनेटय् हेड गोल यानाः अग्रता काःगु खः । तर थ्वयां खुगू मिनेट लिपा ३४ औं मिनेटय् भान डि विकं बराबरी गोल यानाबिलसा ६७ औं मिनेटय् आयाक्सया १९ दँ तिनि दुम्ह मथेइज डि लिग्टं हेड मार्फत उत्कृष्ट गोल यानाः युभेन्टसयात बुकल ।

डि लिग्ट च्याम्पियन्स लिगया नकआउट कासा म्हितूम्ह दकलय् म्हो उमेरया कासामि नं जूगु दु । थ्व पराजय लिसें थुगु सिजनय् जक युभेन्टस वःम्ह स्टार कासामि क्रिष्टियानो रोनाल्डोया च्याम्पियन्स लिगया यात्रा नं क्वचाःगु दु । रोनाल्डो सन् २०१० लिपा न्हापांखुसी च्याम्पियन्स लिगया क्वाटरफाइनलं पिने लाःवंगु खः ।

सम्बन्धित बुखँ

LEAVE YOUR COMMENTS