कासामितय्त याःगु कारबाही नं यानाः क्रिकेट विकासय् अवरोध ः – सिप्यान

येँ ( क्रिकेट खेलाडी संघ नेपालं (सिप्यान) नेपाःया राष्ट्रिय क्रिकेट कासामितय्त नेपाल क्रिकेट संघं (क्यानं) याःगु कारबाहीं यानाः क्रिकेट विकासय् अवरोध जूगु धाःगु दु । सोमवाः सिप्यानं प्रेस वक्तव्य पिकयाः सेन्ट्रल कन्ट्रयाक्टया वर्गीकरणया विषययात कयाः क्यान व नेपाःया राष्ट्रिय क्रिकेट कासामित दथुइ जूगु विवादलिपा कासामितय्त याःगु कारवाहीं यानाः क्रिकेट विकासय् अवरोध जुइगु धकाः धाःगु खः ।

सिप्यानं जारी याःगु प्रेस वक्तव्यय् क्यानं कासामितय्सं तःगु सः व भावनाया सम्बोधन मयासें अखतं कारवाही यागुलिं थःपिनिगु ध्यानाकर्षण जूगु धाःगु दु । सिप्यानया अध्यक्ष मनिषराज पाण्डे व महासचिव पारस खड्कां पिकाःगु संयुक्त वक्तव्यय् क्रिकेटया कासामितय्गु योगदानं यानाः नेपाःया क्रिकेटं विश्वय् थाय् दयेकेत सफल जूगु सकसियां सिउगु धयातःगु दु ।

वर्गीकरण थेंज्याःगु महत्वपूर्ण विषययात पारदर्शी रुपं निश्चित मापदण्डया दुने अवलम्बन यासें तर्कसम्मत व त्रुटीरहित यायेत तथ्यपरक, वस्तुपरक व वैज्ञानिक दयेकेमाःगु धकाः सिप्यानं धाःगु दु । सिप्यानं क्यान व कासामित दथुइया तितmता चिइकाः कासामितय्गु मनोबल थकायेमाःगु व समग्र नेपाःया क्रिकेटयात बांलाइगु पलाः ल्ह्वनेमाःगु धकाः नं धाःगु दु ।

क्यानं वंगु मंसिर २९ गते नेपाः राष्ट्रिय क्रिकेट टिमया कप्तान ज्ञानेन्द्र मल्ल, उपकप्तान दीपेन्द्रसिंह ऐरी, सोमपाल कामी व कमलसिंह ऐरीयात काराबाही याःगु खः । क्यानं टिमया कप्तान ज्ञानेन्द्र मल्ल व उपकप्तान दीपेन्द्रसिंह ऐरीयात पदमुक्त याःगु खः । अथे हे प्यम्ह कासामितय्त सन् २०२२ य् खुला तक सेन्ट्रल कन्ट्रयाक्टं चिइकूगु खः । कासामितय्सं सञ्चार मध्यमय् वयाः वर्गीकरण विषयय् नवाःगु धासें क्यानं कारवाही याःगु खः ।