मनपाया दुनेया ए डिभिजन क्लबतय्त येँ मनपाया झिगू झिगू लाख

येँ (नेपालभाषा टाइम्स) – येँ महानगरपालिकां येँ महानगर दुने लाःगु ए डिभिजन क्लबतय्त झिगू झिगू लाख तका दां ग्वाहालियाःगु दु। येँ मनपां थःगु क्षेत्र दुने लाःगु खुगू ए डिभिजन क्लबयात म्हिगः दां लःल्हाःगु खः ।

राष्ट्रिय सभागृहय् जूगु ज्याझ्वलय् मेयर विद्या सुन्दर शाक्यं मच्छिन्द्र क्लब, सरस्वती युवा क्लब, हिमालयन शेर्पा क्लब, काठमाडौं खेल मण्डल (एनआरटी), संकटा क्लब व मनाङ मस्र्याब्दी क्लबयात झिगू झिगू लाख तकाया चेक लःल्हानादीगु खः ।

ज्याझ्वलय् न्ववानादिसें मेयर शाक्यं कासा ख्यःया विकास व प्रवद्र्धनया निंतिं थ्व ग्वाहालि लःल्हानागु खँ धयादिल । थ्व झ्वलय् वय्कलं कासामितय् विकास व कासाख्यःया विकास यानाः कासायात सहरी जीवनपद्धति दयेकेत महानगरं कासाख्यलय् लगानी अप्वयेका यंकेगु खँ धयादीगु खः ।

वय्कलं धयादीगु दु, ‘जनप्रतिनिधि वयेधुंकाः महानगरपालिकां कासाख्यः, शिक्षा, स्वास्थ्य थेंज्याःगु क्षेत्रयात नं विशेष प्राथमिकता बियाः निरन्तर ज्या याना वनाच्वना.गु दु। कासाख्यःया विकासया निंतिं जिमिसं यानागु थ्व चिधंगु ग्वाहालि जक खः ।’

येँ महानगरपालिकां थगुने नं थःगु क्षेत्र दुने लाःगु ए, बी व सी डिभिजन लिगयात दां ग्वाहालि बिउगु खः । आः छुं न्हि लिपा हे बी व सी डिभिजनया क्लबतय्त नं ग्वाहालि लःल्हायेगु खँ मेयर शाक्यं धयादीगु दु। मनपां थगुने बी डिभिजन क्लबयात स्वंगू स्वंगू लाख व सी डिभिजन क्लबयात निगू निगू लाख दां ग्वाहालि बिउगु खः ।

ज्याझ्वलय् न्ववासें अखिल नेपाल फुटबल संघ (एन्फा)या अध्यक्ष कर्माछिरिब शेर्पां येँ मनपां कासाख्यःया विकासया निंतिं न्हूगु कथंया ज्या याःगु धासें प्रसंशा यानादीगु खः ।

‘डिभिजन क्लबतय्त आर्थिक ग्वाहालि यायेगु ऐतिहासिक परम्परा येँ मनपां सुरु यायेधुंकाः आः मेमेगु महानगरपालिकां नं थज्याःगु ज्यायात निरन्तरता बियाच्वंगु दु। थुकिया निंतिं येँ मनपायात विशेष सुभाय् बी हे माः’ वय्कलं धयादीगु दु । वय्कलं स्वनिलय् बस्ती तःधना वनेवं फुटबल मैदानत लोप जुया वनाच्वंगु धासें थज्याःगु इलय् अभ्यासया निंतिं येँ महानगरपालिकालिसे सहकार्य यानाः न्ह्याः वनेगु बारे सहलह जुयाच्वंगु खँ नं वय्कलं धयादीगु दु ।

अथेहे मच्छिन्द्र क्लबया अध्यक्ष प्रवोधवीर सिंह कंसाकारं नं खेल विकासया निंतिं येँ मनपां याःगु ग्वाहालिया प्रसंशा यानादिल । ‘येँ महानगरपालिकाया न्हूगु नेतृत्वं कासायात थू धयागु जिमिसं वाः चायेकागु दु । फुटबलयात जक मखु, समग्र कासाख्यःयात हे मनपां ग्वाहालि याना वयाच्वंगु जिमिसं स्यू । थ्व सकारात्मक खः’ वय्कलं धयादीगु दु ।

सम्बन्धित बुखँ

LEAVE YOUR COMMENTS