जिदान हाकनं रियलया प्रशिक्षक

जिनेदिन जिदान हाकनं रियल म्याड्रिडया प्रशिक्षकय् नियुतm जूगु दु । रियल म्याड्रिड त्वःतावंगु झिला लिपा जिदान रियल लिहां वःगु खः । जिदानं आः सन् २०२२ तक क्लबया जिम्मेवारी काःगु दु । जिदानं त्वःतेधुकाः जुलियन लोपोतेगी क्लबयात जिम्मेवारी बिउगु खःसा लोपोतेगीयात खराब प्रदर्शनया कारणं बर्खास्त यानाः सान्टियागो सोलारीयात जिम्मा बिउगु खः ।

सान्टियागोया नेतृत्वय् नं क्लबं बांलाःगु कासा म्हिते मफुत । सान्टियागोयात क्लबय् वःगु न्याला लिपा हे बर्खास्त यानाः जिदानयात हे जिम्मा बिउगु खः । जिदानं रियलयात लगातार स्वक्वःतक च्याम्पियन्स लिगया उपाधि त्याका बिउगु खः ।जिदान क्लबय् लिहां वयेधुंकाः थःत छेँय् लिहां वया थें तसकं लय्ताःगु खँ धाःगु दु ।

सोमवाः जूगु ज्याझ्वलय् न्ववासें जिदान क्लबयात हाकनं पुलांगु हे थासय् हयेगु खँ धाःगु खः । जिदानं धाःगु दु, ‘पिने स्वयेबलय् थ्व तसकं थाकु, अय्सां जि क्लबया प्रशिक्षक जुइत तयार दु ।’

रियल म्याड्रिडया अध्यक्ष फ्लोरेन्टिनो पेरेजं संसारया उत्कृष्ट प्रशिक्षक हाकनं क्लब लिहां वःगु खँ धाःगु दु । पेरेज थःपिनिगु उद्देश्य छगू हे जूगु नं धाःगु दु ।रियल म्याड्रिड थ्व सिजनया च्यान्पियन्स लिगं पिने लाःवनेधुंकूगु दु । रियल २२ दँ लिपा थथे प्रिक्वाटरफाइनलं पिने लाःगु न्हापांखुसी खः । ला लिगाय् नं रियल स्वंगूगु थासय् दु ।

सम्बन्धित बुखँ

LEAVE YOUR COMMENTS