क्यान अध्यक्षय् चतुरबहादुर चन्द त्यात
येँ – नेपाल क्रिकेट संघ (क्यान)या अध्यक्षयय् चतुरबहादुर चन्द विजयी जूगु दु । चन्द न्हापा नं क्यानया अध्यक्ष जुइधुंकूम्ह विनयराज पाण्डेयात २९ मतया अन्तरं पराजित यासें अध्यक्ष जुयादीगु खः । चन्दयात ४४ मत वःगु खःसा पाण्डेयात १५ मत जक वःगु खः । थ्व निर्वाचन लिपा क्यानयात अन्तर्राष्ट्रिय क्रिकेट परिषद (आइसिसी) यानातःगु निलम्बन चिलावनीगु सम्भावना ब्वलंगु दु ।
क्यानयात आइसिसीं थ्यंमथ्यं स्वदँत्या न्ह्यवनिसें निलम्बन यानातःगु खः । म्हिगः जूगु निर्वाचनय् झिंन्हयम्ह केन्द्रीय कार्यसमितिइ नं चन्द समूहं हे बहुमत हःगु दु । चन्द समूहपाखें उपाध्यक्ष राजुबाबु श्रेष्ठ, सचिवय् अशोकनाथ प्याकुरेल, कोषाध्यक्ष रोशन कुमारी सिंह त्याःगु दु ।उपाध्यक्षय् श्रेष्ठं मिङ्मा डुन्डु शेर्पायात ४१–१७ मतं, सचिवय् प्याकुरेलं विनोद मैनालीयात ४३–१५ मतं व कोषाध्यक्षय् सिंहं उपेन्द्र भट्टराईयात ४५–१२ मतं बुकूगु खः ।
थ्व पालय् आइसिसीइ दयेकूगु स्वतन्त्र समितिपाखें राष्ट्रिय खेलकूद परिषदया रोहबरय् निर्वाचन याकूगु खः । निर्वाचन पर्यवेक्षण यायेगु निंतिं आइसिसीया प्रतिनिधित नं येँय् वःगु खः । आइसिसीं थ्व निर्वाचन लिपा निलम्बन फुकुवा यायेगु धयातःगुलिं थ्व निर्वाचनयात तसकं महत्व बिया स्वया वयाच्वंगु खः ।
न्हूगु कार्यसमितिया झिंस्वम्ह सदस्यया निंतिं जूगु निर्वाचनय् खुम्ह निर्विरोध जूगु खः । हरेक प्रदेश पाखें छम्ह सदस्य निर्वाचित जुइगु प्रावधान कथं प्रदेश २ पाखें दाउद अन्सारी, प्रदेश ४ पाखे ऋषि गौतम, प्रदेश ५ पाखे प्रशान्त विक्रम मल्ल, प्रदेश ६ पाखें पदम खड्का व प्रदेश ७ पाखें विक्रम विष्ट निर्विरोध जूगु खः ।
अथेहे मिसा सदस्यपाखे जयन्ती भट्ट नं निर्विरोध जुल ।प्रदेश १ व ३ पाखें छसिकथं कैलाश विस्ट व अमितवीर पाण्डे विजयी जगु दु । खुला सदस्यपाखे न्याम्ह सदस्यया निंतिं झिंछम्हेसिया उम्मेदवारी लाःगु खः । गुकी वीरेन्द्र बहादुर चन्द, दुर्गाराज पाठक, करण महोत्रा क्षेत्री, माधव कुमार कर्माचार्य व संजयराज सिंह त्याःगु दु ।
LEAVE YOUR COMMENTS