‘ट्रम्प व रुस दथुइ साँठगाँठ मदु’

निदँ न्ह्यव जूगु अमेरिकी राष्ट्रपति चुनावय् डोनाल्ड ट्रम्प व रुसया दथुइ ‘साँठगाँठ’ मदुगु रिपोर्ट पिहांवःगु दु । थ्व चुनावय् रुसया हस्तक्षेपयात याःजाँच यानाच्वंम्ह विशेष अनुसन्धानकर्ता रोबर्ट मुलरं बिउगु रिपोर्टय् ट्रम्पया चुनाव अभियान टिम व रुस दथुइ साँठगाँठ मदुगु प्रतिवेदन संसदयात लःल्हाःगु खः ।

रुसलिसे साँठगाँठ मदु धाःसां रिपोर्टय् राष्ट्रपति ट्रम्पं न्यायिक प्रक्रियाय् पंगः थंगु मदु धयागु निष्कर्ष धाःसा पिकयातःगु मदु । थुकिं राष्ट्रपति ट्रम्पयात थ्व द्वपनय् धाःसा सफाइ चूमलाःनिगु खँ धाःगु दु ।मुलरया थ्व प्रतिवेदनया सार महान्यायाधिवक्ता विलियम वारं अमेरिकी संसदय् न्ह्यब्वःगु खः ।

सार न्ह्यब्वयेगु झ्वलय् महान्यायाधिवक्ता बारं धाःसा राष्ट्रपतिं न्यायय् पंगः थनेगु अपराध याःगु धयागु बारे पर्याप्त प्रमाण मदुगु खँ धाःगु दु ।
थ्व रिपोर्टयात राष्ट्रपति ट्रम्पया विजय कथं कयातःगु दु । ट्रम्पं नं लसता प्वंकुसें ट्विट याःगु दु, ‘छुं साँठगाँठ मदु, छुं पंगः मदु, फुक्कपाखें दोषमुक्त ।’

महान्यायाधिवक्ता बारं संसदय् थ्व प्रतिवेदनया बारे पूवंक जानकारी याकनं हे पिहां वइ धासें आःयात छुं छुं खँय् प्रतिबन्ध दनिगुख खँ धयादीगु खः । थ्व प्रतिवेदनया सार पिहां वयेवं ह्वाइट हाउसया प्रवक्ता सारा सन्डर्र्सं थ्व प्रतिवेदनं राष्ट्रपतियात पूवंक दोषमुक्त यानाबिउगु प्रतिक्रिया बियादीगु दु ।

मेखे डेमोक्रेटिक पार्टीया सांसद जेरी न्याङलरं महान्यायाधिवक्तां ट्रम्पं न्यायय् पंगः थंगु सम्भावनाया खण्डन धाःसा मयाःगु टिप्पणी यानादीगु दु । अथेहे सिनेटर रिचर्ड ब्लुमेन्टलंं मुद्दा चले यायेगु कथं आपराधिक षडयन्त्र याःगु प्रमाण मदुसां ट्रम्पबारे न्ह्यसः धाःसा यथावत दनि धयादीगु दु ।