ने. सं. ११४६ दिल्लागा पारू -

थौं पञ्जरां व दीपंकर बुद्धया शोभायात्रा

येँ (नेपालाभाषा टाइम्स) – थौं दिल्लाथ्व पुन्हि, दिल्लापुन्हि अर्थात गुरुपुन्हि । थौं दिल्लापुन्हिया लसताय् लाकाः पञ्जरां व दीपंकर तथागत बुद्धया शोभायात्रा याइगु जूगु दु ।

प्रत्येक झिंनिदँय् छक्वः जुइमाः तर वंगु २४ दँ न्ह्यःनिसें जुइ मफयाच्वंगु सम्यक महादानयात लुमंकेकथं थौं दिल्लाथ्व पुन्हि (साउन १३) बुधवाः दीपंकर तथागत बुद्धया शोभायात्रा व पञ्जरां ज्याझ्वः यायेत्यंगु खः । थौं जुइगु थुगु ज्याझ्वः येँ महानगरपालिका २७ वडाय् लाःगु महाबूस्थित महाबुद्ध महाविहारय् जुइ ।

ज्याझ्वःया निंतिं छुं दिं न्ह्यः तयारी बैठकतकं च्वंगु खः । बैठकय् येँ महानगरपालिकाया कार्यवाहक प्रमुख सुनिता डंगोल, २७ वडाअध्यक्ष योगेशकुमार खड्गी व सरोकारवाला निकायया प्रतिनिधितय् सहभागिता दुगु खः ।

पञ्जरां व दीपंकर तथागत बुद्धया शोभायात्रा आः सुथसिया ७ ताः इलंनिसें न्ह्याइ । महाबू महाविहारया दीपंकर बुद्धयात बिज्याकातःगु थासं ज्याझ्वः न्ह्याइ । ज्याझ्वःकथं सुथसिया ९ निसें ११ ताःईतक पञ्जरां बीगु जुइ । वयां लिपा न्हिनसिया १२ ताः इलय् दीपंकर बुद्धयात महाबू, असं, त्यःर, इनबहाः कःमिलाछि, भोताहिति जुयाः असं दबुलिइ बिज्याकी । अनंलि थौं बहनि ७ ताः ईतक पुजाया ज्याझ्वः जुइ ।

प्रत्येक १२ दँय् छक्वः स्वयम्भूया भुइख्यलय् तःजिक सम्यक महादान न्यायेकेगु परम्परा दया वयाच्वंगु दु । सम्यक महादान व पञ्जरांया इलय् दीपंकर तथागतयात बिज्याकाः थ्व परम्परा न्ह्याका वयाच्वंगु खः । दकलय् लिपा २०६० सालय् सम्यक महादान जूगु खःसा वयां लिपा थ्व परम्परा थौंतक दिनाच्वंगु दु ।