ने. सं. ११४३ ञलाथ्व चतुर्दशी -

कोरोना खोप कयाः म्ह चुम्बक जूगु दावी

एजेन्सी- कोरोनाया भ्याक्सिन कायेधुंकाः मनूतय्त थीथी कथंया लिच्वः लाःगु खँ वयाच्वंगु दु । गुलिसितं खोप काये धुंकाः ज्वर वःगु, गुलिं कमजोर जूगु धकाः धाइ । तर भारतया नासिकय् च्वंम्ह छम्ह मनुखं खोप कायेधुंकाः थःगु लाःगु लिच्वः धकाः दावी याःगु खं सकसितं अजू चायायेकाबिउगु दु ।

नासिकया अरबिन्द सोनार नांया उम्ह मनुखं खोपया निगू डोज कायेधुंकाः थःगु म्ह चुम्बक थें जूगु दावी याःगु खः । तर विज्ञतय्सं खोपया कारणं थथे जुइगु असम्भव धकाः धाःगु दु ।
अरबिन्दं सोनारं थःगु दावी न्ह्यब्वयेगु झ्वलय् छगू भिडियो सोसल मिडियाय् सार्वजनिक याःगु दु । उगु भिडियोय् सिक्का, नँया सामान वयागु म्हय् प्यपुनाच्वंगु खनेदु ।

वं धाःगु दु, ‘जि जिमि कायलिसे खँ ल्हानाच्वनाबलय् वं जितः छगू खबर न्यंकल कि खोप कायेधुंकाः स्टिलया सामान मनूतय् म्हय् प्यपुं वने यः । जितः नं थथे हे जू लाकि धकाः स्वयां धाथें थथे हे जिगु म्हय् नँया सामानत प्यपुंवल ।’

सोनारं प्यन्हु न्यान्हु न्ह्यः छगू निजी अस्पतालय् कोभिडया खोप कयागु व थुकिं थःत मेगु छुं समस्या मवःगु खँ धाःगु दु ।

सोनार झिदँ न्ह्यः बाइपास सर्जरी याःम्ह खःसा निदँ न्ह्यवनिसें चिनिल्वय्या नं वास याकाच्वंम्ह खः । सोनारया दावीयात कयाः बिबिसीं भारतया हे छम्ह चिकित्सक हामिद दाभोलकरलिसे यानास्वःगु खँल्हाबल्हाय् दाभोलकरं धाःगु दु, ‘म्हय् सिक्का, भाडाकुडा प्यपुनीगु भौतिक नियम कथं सम्भव दु । यदि छ्यंगू नाइसे च्वं व प्यपुनिगु थासय् भ्याकुम क्याविटी दयाच्वन धाःसा थ्व सम्भव दु, तर खोपया कारणं थथे जूगु धायेगु धाःसा ठीक मखु । कोरानाया महामारीया इलय् थज्याःगु सनसनीपूर्ण म्वाःमदुगु दावी यानाः मनूतय्त खोप पाखें तापकेगु पाय्छि मखु ।’

नासिक जिल्लाया चिकित्सा अधिकारी डा. अशोक थोराटं थुकिया बारे थःपिंत नं थीथी मिडियापाखेृं जानकारी वःगु व थुकिया बारे छानविन यायेगु खँ धाःगु दु । वय्कलं धयादीगु दु, ‘आःतक जिगु मेडिकल क्यारियरय् थज्याःगु गुबलें जूगु मखनानि । शरिरय् खनेदुगु थुगु हिउपाः गुकथं जुल धकाः सिइकेगु नं महत्वपूर्ण जुइ, थ्व छगू रिसर्चया हे विषय खः ।’