भारतय् ज्या बन्द यायेगु एम्नेष्टीया घोषणा

दिल्ली (एजेन्सी) – अन्तर्राष्ट्रिय मानव अधिकारवादी संस्था एम्नेष्टी इन्टरनेशनलं भारतय् आवंलि थःपिनिगु ज्या बन्द यायेगु घोषणा याःगु दु। भारतया प्रवर्तन निर्देशनालय (इडीं) संस्थाया खाता बन्द यायेगु घोषणा यायेवं एम्नेष्टीं उगु घोषणा याःगु खः ।

इडीं दछि न्ह्यः सीबीआई मार्फत प्रहरीइ छगू उजुरी दर्ता यायेवं अनंनिसें बिस्कंकथं जांच शुरु याना वयाच्वंगु खः । विदेशी चन्दा कायेगु बारे दयेकातःगु कानून ‘एफसीआरए’ हाचां गायेगु ज्या नं एम्नेष्टीं याःगु भारत सरकारं द्वपं बिउगु दु। उखे एम्नेष्टीं भारत सरकारं मानव अधिकारवादी संस्थातय्त ‘विच-हन्ट’ यानाच्वंगु द्वपं बिउगु खँ धाःगु दु। भारत सरकारं याःगु अवरोध व आक्रमणया कारणं थःपिं ज्या बन्द यायेगु निर्णय यायेत बाध्य जूगु एम्नेष्टीं स्पष्ट याःगु दु ।

भारत सरकारं थःपिनि कर्मचारीयात विदा यायेत, थःपिनिगु सकतांकथंया अभियान व अनुसन्धानात्मक ज्याझ्वः नं दिकेत बाध्य याःगु एम्नेष्टीं न्ह्यथंगु दु। एम्नेष्टीं भारतय् थःगु ज्या बन्द यायेगु घोषणा यासें जारी याःगु छगू विज्ञप्तीइ सरकारं बदलाया भावना स्वरुव याःगु कारवाही जूगु धासें भारत सरकार हे जिम्मेवार जूगु खँ धाःगु दु ।

वंगु सेप्टेम्बर १० कुन्हु इडीं थःपिनिगु दक्वं बैंक खाता दक्वं फ्रिज याना बिउगु पत्ता लगे जूगु व थुकिं यानाः मानवअधिकारवादी संस्थाया आपालं ज्या नं प्रभावित जू वंगु एम्नेष्टीं न्ह्यथंगु दु। लिसें थःपिनिगु संस्थाया ज्यापाखें भारतया पीगू लाख स्वयां अप्वः मनू प्रत्यक्ष रुपं लाभान्वित जुयाच्वंगु व छगू लाख स्वयां अप्वः चन्दादाता भारतीय हे जूगु नं न्ह्यथंगु दु ।

जम्मू काश्मिर, दिल्लीइ जूगु घटनाया पारदर्शीता व उत्तरदायी जुइत माग तयाः थःपिंसं वकालत यानागुलिं हे मोदी सरकार थःपिलिसे तम्वःगु एम्नेष्टीं न्ह्यथंगु दु। वंगु फेब्रुअरी महिनाय् दिल्लीइ जूगु घटनाय् मानवअधिकारया उल्लंघन जूगु रिपोर्ट एम्नेष्टीं करिब लछि न्ह्यः जक सार्वजनिक याःगु खः । गुगु रिपोर्टयात कयाः दिल्ली प्रहरीं खण्डन याःगु जक मखसे उगु रिपोर्ट, यकःति, पक्षपाति व विद्वेषपूर्ण जूगु नं धाःगु खः ।

विश्वन्यंकंया मानवअधिकारया क्षेत्रय् ज्या याना वयाच्वंगु व स्थापित संस्था एम्नेष्टीं भारतय् ज्या मयायेगु धकाः याःगु घोषणायात छखे अर्थपूर्ण रुपं कया हयाच्वंगु दुसा मेखे एम्नेष्टीया ज्या बन्द यायेगु निर्णयप्रति भारत सरकारं छुं नं प्रतिक्रिया बिउगु मदुनि ।