युरोप व अमेरिकाय् कारोना संक्रमण उच्च

एजेन्सी- युरोप व अमेरिकाय् कोरोना संक्रमण उच्च विन्दुइ थ्यंगु दु । बीबीसीया कथं कोरोना भाइरसया न्हूगु भेरियन्ट ओमिक्रोन खनेदयेधुकाः अमेरिका व युरोपया थीथी देशय् कोरोना संक्रमण उच्च विन्दुइ थ्यंगु खः । अमेरिकाया सेन्टर फर डिजिज एण्ड प्रिभेसन (सिडिसीं) बिउगु जानकारीकथं अमेरिकाय् छन्हुं हे प्यंगू लाख व पीद्वः सिबें अप्वः मनूतय्के कारोना पुष्टि जूगु खः ।

अधिकारीतय्स थ्व ल्याः अप्वःगु छगू कारण क्रिसमस यानाः बालाकं परिक्षण जुइमफुगु धकाः धाःगु दु । अधिकारीतय्सं क्रिसमस व न्हूदँ २०२२ लिपा परीक्षण न्हापा थें जुइगु व संक्रमण अप्व खनेमदइगु धकाः नं धाःगु दु ।

युरोपया थीथी देसय् नं कोरोनाया संक्रमण अप्वःगु दु । फ्रान्सय् मंगलवाः छन्हुया दुने छगू लाख न्हय्गुगुद्वः ८०७ म्हेसिके कोरोना पुष्टि जूगु दु । फ्रान्सया स्वास्थ्यमन्त्री ओलिभर भेरानं फ्रान्सय् जनवरीइ न्हि निगू लाख ५० द्वः सिबें अप्वः संक्रमित खनेदइगु ख्याच्वः बिउगु दु । फ्रान्सलिसें इटाली, ग्रीस, पोर्चुगल व इंग्ल्याण्डय् नं संक्रमण अप्वःगु दु ।

महामारीया कारणं पेरिस, लन्डन व बर्लिनय् जुइगु न्हूदँया ज्याझ्वः रद्द जूगु दु । फ्रान्स व इंग्ल्याण्डया मनूतय्त थःपिनिगु विवेक छ्लेत धाःगु दु । स्पेनं धाःसा सीमित मनूत च्वनाः न्हूदँ न्याकेत धाःगु दु । इटालीइ नं छेँ पिने जुइगु दक्व ज्याझ्वः रद्द यासें नाइट क्लब बन्द याकूगु दु ।

थुखें भारतय् नं कोरोनाया संक्रमण अप्वयावःगु दु । बुधवाः भारतय् ९,९१५ म्हेसिके संक्रमण खनेदुगु खः । थ्व मंगलवाःसिबें ४४ प्रतिशतं अप्वः खः । अथे हे ओमिक्रोन संक्रमितया ल्याः ७८१ थ्यंगु दु । कोरोना सक्रमणया कारणं भारतया राजधानी दिल्लीलिसें थीथी राज्यय् सोमवाःनिसें रात्रीकालीन कफ्र्यु तयेधुंकूगु दु ।

अथे हे दिल्लीइ स्कुल, कलेज, सिनेमा हल, जिम आदि नं बन्द याःगु दु । बस व रेष्ट्ररेन्टय् ५० प्रतिशत मनूत जक तयेदइसा इहिपा व अन्त्येष्टिइ २० म्हं अप्वः मनू मुने दइमखु । अथे हे न्हूदँलिसें मेमेगु ज्याझ्वः यायेगुलिइ नं प्रतिबन्ध तयातःगु दु ।

सम्बन्धित बुखँ

LEAVE YOUR COMMENTS