महान्यायाधिवक्ता नियुक्तय् प्रम शाहया लिसः
येँ (नेपालभाषा टाइम्स) – प्रधानमन्त्री बालेन शाहं महान्यायाधिवक्ता नियुक्त यायेगु अधिकार थःके निहित दुगु धासें सर्वोच्च अदालतय् लिखित लिसः पेश याःगु दु । महान्यायाधिवक्ता डा. नारायणदत्त कँडेलया नियुक्ति संविधान सम्मत मजूगु धासें अधिवक्ता माधवकुमार बस्नेतं दायर याःगु रिटया लिसः बिसें प्रधानमन्त्री शाहं महान्यायाधिवक्ता ल्ययेगु विषय थःगु ‘कार्यकारी विशेषाधिकार’ जूगु दाबी याःगु खः ।
रिट निवेदक बस्नेतं डा. कँडेलया वास्तविक वकालत ई थ्यंमथ्यं स्वदँ जक दुगु व ताः ईतक विदेशय् च्वनाच्वंम्ह जूगुलिं १५ दँया निरन्तर वकालत याःगु योग्यता मदुगु दाबी यासें रिट तःगु खः । उकिया प्रतिवाद यासें प्रधानमन्त्रीं छ्वःगु लिसलय् धयातःगु दु, ‘निरन्तर वकालत धायेबलय् भौतिक रुपं इजलासय् दनेगु ई जक मखु अधिवक्ताया प्रमाणपत्र कायम जुयाः कानुनया क्षेत्रय् क्रियाशीलता दुगु अवस्थायात नं थुइकेमा ।’
प्रधानमन्त्रीया लिसलय् डा. कँडेलं २०६० सालय् अधिवक्ताया प्रमाणपत्र काःगु व नीनिदँनिसें कानुनया क्षेत्रय् निरन्तर संलग्न दुगु धासें धयातःगु दु, ‘विदेशय् उच्च शिक्षा कायेगु वा अन्तर्राष्ट्रिय मञ्चय् निरन्तर कानुनी अनुभव कायेगु योग्यताया थप सबल पक्ष खः । थुकिं व्यवसायिक रुपं रिक्तता वइ मखु ।’
सत्तारुढ दलया नेता विरुद्ध मुद्दाय् कँडेलं न्हापा वकालत याःगु कारण स्वार्थ ल्वाःगु जुइ धइगु दाबीयात प्रधानमन्त्रीं ‘व्यावसायिक तटस्थता’ या सिद्धान्त अःखः जूगु खँ धासें लिसः च्वःगु दु, ‘वंगु इलय् सुयागु मुद्दा स्वल धइगु खँ वर्तमानया संवैधानिक जिम्मेवारीयात लिच्वः लाइ मखु । यदि गुगुं नं मुद्दाय् स्वार्थ ल्वाइगु निश्चित अवस्था वल धाःसा सम्बन्धित व्यक्ति प्रक्रियां बिस्कं च्वनेगु हे माक्व आधार जुइ ।’
LEAVE YOUR COMMENTS