फ्रान्सया प्रशिक्षकय् जिदान
पेरिस – फ्रान्सया राष्ट्रिय फुटबल टोलीया प्रशिक्षकय् पुलांम्ह कप्तान जिनेदिन जिदान नियुक्त जूगु दु । २३ क्वःगु संस्करणया विश्वकप फुटबलय् उपाधिया दावेदारकथं कयातःगु फ्रान्स प्यंगूगु थासय् सीमित जुइवं डिडिएर डेसच्याम्पया थासय् जिदानयात फ्रान्सेली फुटबल टोलीया प्रशिक्षक नियुक्त याःगु खः ।
सन् २०१८ य् फ्रान्सयात विश्वकप त्याकेगुलिइ भूमिका म्हितूम्ह डेसच्याम्पं १४ दँ तक फ्रान्सेली फुटबलया प्रशिक्षकया जिम्मेवारी दुगु खः । फिफा विश्वकप २०२६ य् सेमीफाइनलय् स्पेनलिसे पराजित जुइवं डेसच्याम्पं प्रशिक्षकं राजीनामा बिउगु खः ।
फ्रान्सेली फुटबल महासंघ (एफपएफएफं) डेसच्याम्पं राजीनामा बीवं वयागु थासय् फ्रान्सेली फुटबल टोलीया न्हूम्ह प्रशिक्षकया रुपय् पुलांम्ह कप्तान जिदानयात नियुक्त याःगु खः ।
सन् १९९८ य् फ्रान्सं न्हापांखुसी डेसच्याम्पया कप्तानीइ विश्वकप उपाधि त्याकूगु इलय् नवनियुक्त प्रशिक्षक जिदान मुख्य कासामि खः । १९९८ य् फ्रान्सयात विश्वकप उपाधि त्याकेगुलिइ मुख्य भूमिका म्हितूम्ह जिदान वयां स्पेनिस क्लब रियल म्याड्रिडया प्रशिक्षक जूगु खः । सन् २०२१ य् रियल त्वःतेधुंकाः जिदान प्रशिक्षकया भूमिकापाखें तापाक च्वनाच्वंगु खः ।
फ्रान्स फुटबल टोलीया प्रशिक्षकया रुपय् जिदानं एफएफएफलिसे सन् २०३० तकया निंतिं सम्झौता याःगु बेलायती समाचार संस्था बीबीसीं न्ह्यथंगु दु ।
जिदानया प्रशिक्षणय् फ्रान्सेली फुटबल टोलीं न्हापांगु कासा वइगु सेप्टेम्बरय् ‘युईएफए नेसन्स लिग’ अन्तर्गत टर्की विरुद्ध न्हापांगु कासा म्हितीगु जुइ ।
LEAVE YOUR COMMENTS