फ्रान्सय् तांन्वयाः सीपिं अप्वल

पेरिस – फ्रान्सय् अभूतपूर्व रुपं तांन्वयाः सीपिनिगु ल्याः गाक्कं अप्वःगु दु । वंगु जुन महिनाया लिपांगु वाःपाखे अभूतपूर्व रुपं तांन्वयाः सीपिनिगु ल्याः झण्डै ३० प्रतिशतं अप्वःगु समाचार पिहां वःगु दु । थ्व छगू प्रारम्भिक तथ्यांक जक खः ।

पूर्ण रुपं थुकिया ल्याः पिहां मवःगुलिं सीपिनिगु ल्याः अझ अप्वये फुगु धाःगु दु । सार्वजनिक स्वास्थ्य निकायं अझं पूर्णरुपं विवरण मवःनिगुलिं वास्तविक ल्याः थ्व स्वयां नं अप्वये फुगु अनुमान याःगु दु ।

पब्लिक हेल्थ फ्रान्सयाकथं जुन २२निसें शुरु जूगु तांन्वयेगु थुगु वालय् वंगु वाःया तुलनाय् निद्वः व नीन्याम्ह थप सीगु दु । थ्व धइगु २९.१ प्रतिशतं वृद्धि खः । संस्थां आतक उपलब्ध तथ्यांक अपूर्ण जूगुलिं वास्तविक तथ्यांकं अझ अप्वः प्रभावित व गम्भिर जुइफुगु धाःगु दु ।

राजधानी पेरिसय् दकलय् अप्वः प्रभाव लाःगु दु । पेरिसय् थ्व हे अवधिइ ६२ प्रतिशतं मृत्युदर अप्वःगु खँ धाःगु दु । अथे हे पेस डे ला लोयर क्षेत्रय् नं अत्याधिक मात्राय् तापक्रम अप्वःगु रेकर्ड याःगु प्रतिवेदनय् न्ह्यथनातःगु दु ।

वंगु जुनय् फ्रान्सय् करि ब ११ न्हुतक इतिहासय् दकलय् तच्वकं तांन्वःगुया लहर सामना याये माःगु खः ।