अमेरिकाया कारणं वार्ता स्यंगु द्वपं
उत्तर कोरियाली नेता किम जोङ्ग अनं अमेरिका लिसे जुयाच्वंगु वार्तायात निरन्तरता बीत कुटनीतिक पहल यायेगु कि मयायेगु धयागु बारे याकनं हे निर्णय यानादीत्यंगु खँ छम्ह उत्तर कोरियाली वरिष्ठ अधिकारीं धाःगु दु । अथेहे नेता किमं क्षेप्यास्त्र व आणविक परीक्षण दिकेगु बारे नं याकनं निर्णय याइगु खँ वय्कलं धयादीगु दु ।
उम्ह अधिकारीं उत्तर कोरियाली नेता व अमेरिकी राष्ट्रपति दथुइ भियतनामया हनोइ जूगु निक्वःगु शिखर वार्ताय् अमेरिका बांलाःगु ह्वःताःयात त्वःफिकूगु खँ नं धयादीगु दु । उत्तर कोरियाली विदेशमन्त्री चो सोन हुई प्योङ्गयाङ्गय् विदेशी कुटनीतिज्ञ व संवाददातातय्त संवोधन यायेगु झ्वलय् थ्व खँ धासें वार्ताय् छुं नं सहमति मजूगु खँय् उत्तर कोरिया दुःखी दुगु खँ नं धयादीगु खः ।
अथेहे वय्कलं अमेरिकां रुचि क्यनामच्वंगु अवस्थाय् वार्ता हाकनं जुइगु सम्भावना नं मदुगु खँ स्पष्ट यानादीगु दु । शिखर वार्ता प्रक्रियाय् सहभागी उपविदेशमन्त्री चों वार्ताय् अमेरिकाया पह खनाः कोरियाली नेता अजू चाःगु खँ नं धयादीगु खः ।
वय्कलं अमेरिकी राष्ट्रपति डोनाल्ड ट्रम्प वार्ताय् भचा लचिलो खनेदुगु खःसां विदेशमन्त्री माइक पोम्पेओ व अमेरिकी राष्ट्रिय सुरक्षा सल्लाहकार जोन बोल्टनया हठपूर्ण मागं यानाः वार्ता दथुइ हे त्वाःदःगु खँ नं धयादीगु दु । अथेहे अमेरिकी राष्ट्रपतिया वरिष्ठ सल्लाहकारतय् पाखें वयाच्वंगु धापूया कारणं नं वार्ताया वातावरण झन स्यना वनाच्वंगु द्वपं नं वय्कलं बियादिल ।
मेखे पोम्पेओ व बोल्टनं उत्तर कोरियाया थ्व द्वपंया धाःसा खण्डन यानादीधुंकूगु दु । ‘उमिसं धाःगु खँय् सत्यता मदु’ पोम्पेओं धयादीगु दु । अथेहे बोल्टनं राष्ट्रपति ट्रम्प हे अन्तिम निर्णयकर्ता जूगु खँ धयादीगु दु ।विदेशमन्त्री पोम्पेओं क्षेप्यास्त्र व आणविक परीक्षण स्थगत यायेगु किमया प्रतिबद्धताय् राष्ट्रपति ट्रम्पं विश्वास यानादीगु स्पष्ट यानादीगु दु ।
LEAVE YOUR COMMENTS