३ मिनेटं त्वाःदःगु इहिपा

इहिपा छगू अज्याःगु पवित्र गठबन्धन खः, गुगु छकः स्वायेधुंकल कि जीवन्त पर्यन्त नापं ह्वनाच्वनेमाः । थ्व अपवादया खँ खः कि गुलि गुुलिसियां थ्व स्वापू ताःईतक कायम जुयाच्वनी मखु । व्यक्तिगत, घरायसी, शैक्षिक, सामाजिक लगायत थीथी कथंया घटनाया कारणं सम्बन्ध त्वाःथलेत अर्थात पार कायेत बाध्य जुइ ।

अय्नं इहिपा छगू क्वातुगु व गबलें नं मब्यनीगु सम्बन्ध खः । संसारय् अनेक कारणं सम्बन्ध त्वाः दलाच्वंगु नं दइ । तर गुगुं सम्बन्ध इहिपा याःगु छुं ई लिपा हे त्वाः दलीगु धइगु सम्भवतः थ्व संसारय् हे दकलय् याकनं ‘डिभोर्स’ या घटना जुइफु ।थ्व घटना खः, अरबी देय् कुवेतया । कुवेतय् जूगु डिभोर्सया अर्थात पारपाचुके अर्थात तलाकया घटना संसारय् दकलय् याकनं व न्हापां जक मखसे कीर्तिमानी रुपं हे जूगु दु ।

इहिपा जूगु मात्र ३ मिनेटया दुने कलाःतं भाःतयात पारपाचुकूगु खः । कलाःतं भाःतयात तलाक बिउगुया कारण नंं कम न्ह्यइपु मजू । समाचारकथं मिसा व मिजं इहिपाया निंतिं अदालतय् थ्यंकः वल । अदालत वःपिं इपिं थःपिनिगु न्हू जीवनया निंतिं तसकं उत्साहित अले लय्तायाः वःपिं खः ।

तर अदालतय् जब इपिं निम्ह तिपू जुयाः अदालती प्रक्रिया क्वचायेकाः पिहां वल । अदालतं पिहां वयेगु झ्वलय् लुखाय् तुति तक्यनाः मिसा क्वःदल । थः कलाःयात थनेगु पलेसा वया भाःतं अःखबतं ‘मूर्खम्ह मिसा’ धकाः ब्वः बिल । नकतिनि जक इहिपा यानाः पिहां वःम्ह थः भाःतं थःत माया मतिना यायेगु पलेसा अःखबतं उकथं दुर्वचन नवानाः दुव्यर्वहार यायेवं तम्वःम्ह मिसा अदालतय् वनाः सम्बन्ध विच्छेदया निंतिं इनाप याःगु खः ।

सम्बन्ध विच्छेद यायेत वयागु धइगु मिसाया खँ न्यनाः अनच्वंपिं सकलें छझाः वाताहां जुल । मिसाया खँ न्यानाः न्यायाधिश नं अजू चाल । न्हापां ला न्यायाधिशं थःगु निर्णयप्रति पुनःविचाः यायेत मिसायात इनाप नं याःगु खः । तर मिसां थःगु अडान मत्वःतेवं न्यायाधिशं नं सम्बन्ध विच्छेदया फैसला याना बिल ।

थ्व घटना मात्र स्वंगू मिनेट दुने जूगु खः । अर्थात इहिपा जूगु भ्वँतय् ल्हाःचिं तयाः पिहां वयाखतं मिसा क्वःदयेवं हाकनं दुहां वनाः पारया निवेदन तःगु व अदालतं फैसला याःगु ई मात्र ३ मिनेट खः । कुवेतया इतिहासय् इहिपा याःगु ३ मिनेट दुने पार काःगु थ्व घटना न्हापांगु खःसा संसारय् नं दकलय् चिहाकःगु वैवाहिक सम्बन्ध खयेमाः धइगु चर्चा जूगु दु ।