ट्रम्प पाखें राष्ट्रपति निर्वाचन त्याःगु दावी

एजेन्सी – अमेरिकाय् राष्ट्रपति ल्ययेगु चुनावया लिच्वः पिहां वयेत छुं भचा लिबावंगु दु । न्हापा न्हापा जूसा अमेरिकी ई कथं चुनाव क्वचाःगुया चान्हय्कुन्हु (नेपाली ई कथं ४ नोवेम्भर दुने) हे सु त्यात धयागु लिच्वः पिहां वयेधुंकूगु खः । तर थुगुसी १० करोडं मल्याक हुलाक मार्फत मतदान जूगुलिं मतगणना लिबाःगु दुसा म्हिगः सनिलय् तकया दुने निम्ह उम्मेदवारत डोनाल्ड ट्रम्प व जो बाइडेन दथुइ कडा प्रतिस्पर्धा खने दयाच्वंगु दु ।

म्हिगः सनिलय् तक क्वचाःगु मतगणना कथं जो बाइडेन २३५ इलेक्ट्रोल मत कयाः न्ह्यःने लानाच्वंगु खःसा डोनाल्ड ट्रम्पया २१३ जक इलेक्ट्रोल मत खनेदयाच्वंगु खः । तर मतगणना जारी जुयाच्वंगु राज्यय् अप्वः थासय् ट्रम्प हे न्ह्यःने लानाच्वंगु ल्याखं थ्व पालय् नं ट्रम्पं हे ह्वाइट हाउसया नेतृत्व याइगु खनेदयाच्वंगु दु । अमेरिकाय् राष्ट्रपतिइ निर्वाचित जुइत २७० इलेक्ट्रोल मत माः । राष्ट्रपति डोनाल्ड ट्रम्पं थःम्हं निर्वाचन त्याःगु दावी यानादीधुंकूगु दु, तर गुलिखे राज्यय् मतगणनाया पूवंक लिच्वः मवःनिगुलिं त्या हे त्यात धायेफइगु अवस्था मदुनि । ह्वाइट हाउसय् सम्बोधन यासें ट्रम्पं धाःगु दु, ‘झी थ्व निर्वाचन त्याकेत तयार जुइधुंकूगु दु,अझ स्पष्ट धायेमाल धाःसा झीसं निर्वाचन त्याकेधुनागु दु ।’

ट्रम्पं निर्वाचन त्याःगु दावी याःसां मतगणनाय् तःधंगु लिच्वः लाकेफुगु जर्जिया, विस्कन्सिन, पेनसिल्भेनिया व मिसिगन थेंज्याःगु राज्यया लिच्वः बुधवाः सनिलय् तक पिहां मवःनि । थुपिं राज्यया डेमोक्र्याट उम्मेदवार त्याइगु सम्भावना दुगु शहरी क्षेत्रय् तःधंगु ल्याखय् मत ल्याखाये ल्यंदनि । अथे जूगुलिं थुपिं राज्यय् ट्रम्प न्ह्यःने लानाच्वंसां त्या हे त्याइ धयागु पक्का धाःसा जुइफुगु मदुनि । यक्व मतदातातय्सं हुलाकपाखें मतदान याःगुलिं पेनसिल्भेनियाय् मतगणना क्वचायेकेत अझं छुं न्हि काइतिगु खँ धाःगु दु ।

ट्रम्पं धाःगु दु, ‘दकलय् महत्वपूर्ण खँ, झी पेनसिल्भेनियाय् विशाल मतान्तरणं त्यानाच्वंगु दु ।’ थन बुधवाः सनिलय् तक ७४ प्रतिशत मत ल्याखाये धुंकूगु स्थितिइ ट्रम्पयात ५५.६ प्रतिशत मत वःगु दुसा बाइडनं ४३ प्रतिशत जक मत वःगु दु । तर थनया तःधंगु शहर फिलाडेल्फियाय् ४८ प्रतिशत जक मत ल्याखायेधुंकूगु दुसा थन शहरं बाइडनयात अप्वः मत वइगु अपेक्षा यानातःगु दु । मिसिगन व विस्कन्सिनया अवस्था नं अथे हे दु । उकिं थुगुसी लिच्वःया अनुमान यायेफइगु अवस्था खनेमदु ।