शान्तिवार्ताया रुसी मध्यस्थकर्तायात विष आक्रमण जूगु दावी
एजेन्सी- युक्रेन व रुस दथुइ जुयाच्वंगु युद्धया झ्वलय् न्ह्यानाच्वंगु शान्ति वार्ताय् मध्यस्थता यानाच्वंम्ह रुसी अर्बपति रोमन अब्रामोभिचयात शंकास्पद विषं लिच्वः लाकूगु समाचार पिदंगु दु । वय्कःलिसे सतिगु स्रोतं युक्रेन व बेलारुसया सीमाय् जूगु शान्ति वार्ताय् वय्कःयात विषया असरं लाइगु लक्षण खनेदुगु खँ धाःगु खः ।
बेलायती फुटबल क्लब चेल्सीया थुवाः अब्रामोभिचयात आः लनेधुंकूगु खँ धाःगु दु । विषया कारणं वय्कःया मिखा व छ्यंगुलिइ समस्या वःगु खँ धाःगु दु । थ्व विषं निम्ह युक्रेनी वार्ताकारतय्त नं लिच्वः लाकूगु खँ समाचारय् पिदंगु दु ।
रुस व युक्रेन दथुइ वार्ता चाहे मजूपिं रुसया कट्टरपन्थीतय्सं वार्ता स्यंकेगु निंतिं विष छ्यःगु खँ नं थीथी समाचारय् पिदंगु दु । तर थज्याःगु समाचार पिदनेवं छम्ह अमेरिकी अधिकारीं समाचार संस्था रोयटर्सयात प्रतिक्रिया बीगु झ्वलय् अब्रामोभिचयात खनेदुगु लक्षण विषया कारणं मखुकि वातावरणया कारणं जूगु थःपिनि गुप्तचरतय्सं सुचं बिउगु धाःगु दु ।
युक्रेनं नं थः वार्ताकारतय्त विषया प्रभाव लाःगु धयागु समाचार सत्य मखु धकाः धाःगु दु । युक्रेनी राष्ट्रपति कार्यालयया छम्ह अधिकारीं थः प्रतिनिधिपिंसं अब्रामोभिचलिसे खँ मल्हाःगु व थः प्रतिनिधिमण्डलया दुजःपिं सकलें ठीक जूगु धासें विषया असर लाःगु धयागु समाचार मिथ्या खः धकाःगु दु ।
बिबिसीया समाचारदाता फ््रयांक गार्डनरं अब्रामोभिचया सतिगु स्रोतयात उद्ढृत यासें थ्व धाथें जूगु व अनुसन्धानकर्तातय्सं नियतवश रासायनिक तत्व छ्यःगु निष्कर्ष पिकाःगु खँ धाःगु दु ।
मेखे थ्व घटनां यानाः युक्रेन व रुस दथुया वार्ताय् अब्रामोभिचं मध्यस्थकर्ताया भूमिका म्हिताच्वंगु खँ धाःसा सार्वजनिक जूगु दु । रुस युक्रेन युद्ध लिपा अमेरिका व युरोपेली देय्तय्सं प्रतिबन्ध तःपिं रुसी अर्बपतितय् धलखय् अब्रामोभिचया नां नं दुथ्याः ।
अब्रामोभिचं थ्व महिना जूगु वार्ताया निंतिं तःक्वःगु हे छगू थासं मेथाय् यात्रा याःगु व वं युक्रेनी राष्ट्रपति भोलोदिमिर जेलेन्स्कीयात नं नापलायेधुंकूगु दावी यानाः समाचार पिदनाच्वंगु दु ।
LEAVE YOUR COMMENTS