संरक्षणया अभावय् जीर्ण त्रिभुवन पार्क

येँया थानकोटय् च्वंगु ऐतिहासिक, सांस्कृतिक व मनोरञ्जनया दृष्टिं महत्वं जाःगु त्रिभुवन पार्क जीर्ण जुजुं वंगु दु । पार्कया संरक्षणया निंतिं राज्यपक्षपाखें आवश्यककथंया बजेट विनियोजन मयाःगु व स्तरोन्नतिया निंतिं नं खास हे योजना हये मफुगुलिं पार्कया सुन्दरता म्हो जुजुं वंगु खः ।

उगु पार्कया नां त्रिभुवन पार्क जूसां नं आः वयाः त्रिभुवनया झ्वाता तकं बेवारिसे अवस्थाय् वांछ्वयातःगु दु । त्रिभुवनया झ्वाताया जव ल्हाः त्वःधूगु अवस्थाय् लानाच्वंगु दु । भुखाय् ब्वःगु इलय् झ्वाता थहां वनेगु लँय् लानाच्वंगु खः । आः उकियात पुखू लिक्कं तये हयातःगु दु ।
भुखाचं त्रिभुवनया झ्वाता क्वःदलाः बेवारिस अवस्थाय् तयातःगु दुसा न्हापा झ्वाता धंका तःगु थासय् त्रिभुवनया लाकांया अवशेष जक ल्यनाच्वंगु दु ।

वि.सं. २०७२ साल बैशाख १२ गतेया विनाशकारी भुखाचं क्वःदःगु त्रिभुवनया उगु झ्वाता दँदँ दये धुंकाः नं दयेके फयाच्वंगु मदुनि । पार्कयात उचित किसिमं व्यवस्थापन याये मफुगुलिं पार्कया चहलपहल नं म्हो जुजुं वनाच्वंगु स्थानीयवासीया धापू दु । सछि व ख्वीन्यापी क्षेत्रफलय् न्यना वनाच्वंगु पार्कया प्यखेरं तयातःगु पःखाः व बार बन्देज तकं दुनाच्वंगु अवस्था दु ।

पार्कया प्यखेरं थाय्थासय् दुनाच्वंगु पःखाःयात बजेटया अभावय् निर्माण याये मफुगुलिं स्थानीयवासी लाक्वपाक्व धंगं प्रयोग यायेगु व दुहां वनाः पार्कय् दुने फोहर यायेगु यानाच्वंगुलिं थनया स्वरुपयात हे कुरुप यानाच्वंगु शहीद स्मारक प्रकृति प्रतिष्ठानया कार्यवाहक अध्यक्ष मदन ताम्राकारं कनादिल ।

वय्कःया कथं बजेट अभावया कारणं क्वःदलाच्वंगु त्रिभुवनया झ्वाता तकं थने फयाच्वंगु मदु । पार्कया अस्तित्व ल्यंका तयेगु निंतिं सम्बन्धित निकायय् बजेट व्यवस्था यायेत इनाप यायेगु ज्या जुयाच्वंगु दु, तर आवश्यक ग्वाहालि धाःसा वयाच्वंगु मदु । पार्क दुने गबलें गबलें न्यायेकेगु याना वयाच्वंगु गुँभ्वय् व मेमेगु ज्याझ्वःपाखें हे कर्मचारीया निंतिं मुश्किलं तलब नकेगु याना वयाच्वनागु प्रतिष्ठानया कार्यवाहक अध्यक्ष ताम्राकारं कनादिल ।

गुगुं इलय् गुँभ्वय् न्यायेत वइपिं म्वः म्वः दयाः चाःहिलेगु थाय् तकं मदयाः समस्या जुइगु त्रिभुवन पार्कय् थौंकन्हय् चाःहिलेत, आराम यायेत व गफ यायेत बाहेकं मेपिं सुं नं वयेगु यानाच्वंगु मदु । तत्कालीन जुजु त्रिभुवन मदयेधुंकाः वयागु लुमन्तिइ वि.सं. २०२४ सालय् श्री ५ त्रिभुवन स्मारक समिति गठन यानाःगु खः ।

केशव शम्शेर जबराया अध्यक्षताय् गठन याःगु उगु समितिइ गुम्ह दुजः दुगु खः । वि.सं. २०२४ सालय् दर्ता जुयाः २०२८ सालय् निर्माण याःगु त्रिभुवन पार्क शुरुया दिनय् सछि व झिंनिपी क्षेत्रफलय् न्यनाच्वंगु खः । लिपा पार्कया चहलपहल अप्वया वनेवं श्री ५ त्रिभुवन स्मारक समितिं हे वि.सं. २०४२ सालय् पार्कया जःखः च्वंगु थप ४० रोपनी जग्गा न्यानाः पार्कया क्षेत्रफल तब्या यायेगु ज्या याःगु खः ।

त्रिभुवन पार्क दुने जुजु त्रिभुवनया झ्वाता व भैरःद्यःया देगः दु । तर भुखाय् लिपा त्रिभुवनया झ्वाता पुखूया लिक्कसं क्वःदयाच्वंगु अवस्थाय् लानाच्वंगु दु । शालिक मर्मत यानाः धंकेगु निंतिं तकं बजेटया अभाव जुयाच्वंगु प्रतिष्ठानं न्ह्यथंगु दु । वि.सं. २०३०÷०३१ निसें सर्वसाधारणया निंतिं खुल्ला याःगु पार्कया उलेज्या तत्कालीन जुजु वीरेन्द्र यानादीगु खः ।

उकिया संरक्षण व हेरचावया निंतिं नीन्हय्म्ह कर्मचारी तयातःगु दु । उकीमध्ये नीम्ह कर्मचारी स्थानीय खः । सछि व ख्वीन्यापी क्षेत्रफलय् न्यना वनाच्वंगु उगु पार्कया लँपु सडक विभागपाखें १० रोपनी कट्टा जुइवं थौंकन्हय् सछि व न्यय्न्यापी क्षेत्रफलय् सीमित जूगु दु ।

विभागं लँ दयेकेगु झ्वलय् पार्कया बार बन्देजयात स्यंकाः अलपत्र अवस्थाय् त्वःता बीवं थप समस्या ब्वलना वयाच्वंगु पार्कया कर्मचारीतय्सं धाःगु दु । वि.सं. २०६५ साल स्वयां न्ह्यः तक थ्व पार्कया नां श्री ५ त्रिभुवन स्मारक समिति दुगु खः । वि.सं. २०६५ सालय् उगु नांयात हिलाः शहीद स्मारक प्रकृति प्रतिष्ठान तयेगु ज्या जूगु खः ।