बेलायतं वइपिंत प्रतिबन्ध

एजेन्सी – बेलायतय् कोरोनाया न्हूगु ताजिया भाइरस खनेदयेवं नेपालं नं बेलायतं वइगु उडानयात प्रतिबन्ध तःगु दु । नेपाः व बेलायत दथुइ तप्यंक हवाइ सेवा मदुसां मेमेगु देय् जुयाः बेलायतपाखें नेपालय् मनूत दुहां वयेगु यानाच्वंगु दु। नागरिक उड्डयन प्राधिकरणं बुधवाः चान्हय् ११ः५९ बजे लिपा बेलायत वा बेलायत जुयाः नेपाः वइपिं यात्रुतय्त नेपालय् महयेत फुक्कं वायुसेवा कम्पनीतय्त निर्देशन बिउगु खः । कोभिड-१९ संकट व्यवस्थापन केन्द्र सिसिएमसीया निर्देशक समितिया बैठकं बेलायतं नेपाः वइपिंत प्रतिबन्ध तयेगु निर्णय याः कथं थ्व निर्देशन बिउगु खः ।

सिसिएमसीया संयोजक महेन्द्र गुरागाँइनं ‘बुधवाः चान्हनिसें बेलायतं वइपिंत प्रतिबन्ध तःगु व थ्वयां न्ह्यः नेपाः दुहां वःपिंत होटलय् क्वारेन्टाइनय् तयाः स्वास्थ्य परीक्षण यानाः जक छेँय् छ्वयेगु’ खँ धयादीगु दु । कोरोनाया न्हूगु भाइरस नेपाः दुहां वयेके मबीत सरकारं याःगु निर्णय सकारात्मक जूगु खँ जनस्वास्थ्यविद्तय्सं धाःगु दु । तर उमिसं नेपालय् कोरोना संक्रमण अप्वयाच्वंसां परीक्षण म्हो जूगुलिं कोरोना भाइरसयात म्हितेगु यक्व थाय् दइगुलिं नेपालय् हे कोरोनाया न्हूगु भाइरस उत्पत्ति जुइफुगु खतरा दुगु खँ नं धाःगु दु। नेपालय् कोरोना भाइरसं रुप हिलेफुगु जोखिम यक्व दुगुलिं परीक्षण, संक्रमिततय् सम्पर्कय् वःपिंत मालेगु व आइसोलेसनय् तयेगु ज्या अप्वयेकेमाःगु खँ धाःगु दु ।

सम्बन्धित बुखँ

LEAVE YOUR COMMENTS