लोकसेवा विरुद्ध अःखतं न्यासि वनीगु

येँ – लोकसेवा आयोगं स्थानीय तहया कर्मचारी भर्ना सम्बन्धी विज्ञापनय् आरक्षण मबिउगु विरुद्ध आन्दोलन याना वयाच्वंगु ‘आरक्षण बचाऔं अभियानं’ थप ज्याझ्वः घोषणा याःगु दु । न्हूगु ज्याझ्वः कथं थौं मिडिया हाउसया पत्रकारतय्त नापलाइगु ग्वसाः दु ।

उकथं हे आदिवासी जनजाति, मधेशी, दलित, मुस्लिम, मिसा, अपाङ्गता दुपिं, लिउने लाकातःगु समुदाययात कःघाये कथं साउन २० निसें २३ गते तक जिल्ला तहलय् आरक्षण बचाऔ आन्दोलनया मंकाः संयन्त्र दयेकेगु ज्याझ्वः तयातःगु दु ।

थुकिया निंतिं संघ व प्रदेशया सांसद, राजनीतिक नेता, नागरिक समाज, मानवअधिकार व बहिष्कृत–सीमान्तकृत समुदायया नेतातलिसे प्रदेश स्तरीय अन्तक्र्रिया ज्याझ्वः दु । अथे हे साउन २१ गते म्हुतुइ हाकुगु पत्ति चिनाः मौन जुलुस पिकायेगु व २२ गते अखःतं न्यासि वनेगु ज्याझ्वः दु ।

साउन २४ गते नीन्याक्वःगु विश्व आदिवासी दिवसयात आन्दोलनया रुपय् न्यायेकेगु ज्याझ्वः तयातःगु दुसा उकुन्हु आदिवासीया सांस्कृतिक झाँकी व परम्परागत हतियारत सांकेतिक रुपं ब्वज्या याइगु ज्याझ्वः नं दु ।

साउन २६ गते सिंहदरवार, प्रदेश मुख्यमन्त्री ज्याकू, लोक सेवा ज्याकुथी धर्ना बीगु ज्याझ्वः दुसा २८ व २९ गते प्रधानमन्त्री निवास बालुवाटार व प्रदेश प्रदेशय् मुख्यमन्त्रीया निवासय् धर्ना बीगु ज्याझ्वः तयातःगु दु । अथे हे आन्दोलनया लिपांगु न्हिं कुन्हु कथि ज्वनाः मार्चा पास यासें प्रदर्शन यायेगु व वयां लिपा जनसभा यायेगु ज्याझ्वः तयातःगु दु ।

 

सम्बन्धित बुखँ

LEAVE YOUR COMMENTS