महत्वाकांक्षी नीति कार्यक्रम

येँ -राष्ट्रपति विद्यादेवी भण्डारीं म्हिगः सदनय् सरकारया अतिकं महत्वाकांक्षी ढंगं तयार याना तःगु नीति तथा कार्यक्रम प्रस्तुत यानादिल । एमाले व माओवादी निगू पार्टी छगू जुइधुंकाः निर्माण जूगु अतिकं शक्तिशाली सरकारया उगु नीति तथा कार्यक्रमय् दछिया दुने यायेगु ज्याझ्वः जक मखुसें आः वइगु न्यादँ व झिदँया दुने गज्याःगु नेपाः निर्माण जुइ धइगु दूरगामी लक्ष्य समेत न्ह्यब्वयातःगु दु ।

नीति तथा कार्यक्रमय् आः वइगु न्यादँया दुने नेपाःमिया प्रतिव्यक्ति आय निदुगं यायेगु ग्वसाः प्रक्षेपण यानातःगु दु । सरकार न्यादँया लागिं चले जुइगु व उलिया दुने देश विकास यानाः थ्व लक्ष्य पूवंकेगु खँ उकी न्ह्यथनातःगु दु ।
आः वइगु न्यादँ तकया दुने देशं दोहोरो अंकया विकासया गति ज्वनीगु दावी नं यानातःगु दु ।

अथे हे स्वास्थ्य ख्यलय् तीव्र विकास यानाः आः वइगु न्यादँया दुने तःधंगु ल्वय् जुल धकाः सुं नं विदेश वने म्वाःलीगु अवस्था जुइगु खँ नं धयातःगु दु ।

नेपाःयात आः लोडशेडिङ मुक्त देश घोषणा यायेधुंकूगु कारणं उद्योगया आः तीव्र विकास जुइगु अनुमान यासें उद्योग क्षेत्रयात २४ सै घन्टा विद्युत उपलब्ध याकेगु प्रतिवद्धता नं उकी प्वंकातःगु दु ।
थ्व योजनाय् नेपाःया पूर्वनिसें पश्चिम तक स्वाइगु मेगु पहाडी राजमार्ग दयेकेगु व उकियात मदन भण्डारी राजमार्ग नां तयेगु प्रस्ताव नं यानातःगु दु ।

पर्यटन विकासया ख्यलय् तःधंगु ज्या यानाः थ्व दँय् २० लाख पर्यटक नेपाः दुकायेगु योजना दुगु खँ नं उकी उल्लेख दु ।
सरकार एकीकरण जुइधुंकाः अतिकं तःधंगु आत्मविश्वास ब्वलनाः थ्व नीति तथा कार्यक्रम नं अतिकं महत्वाकांक्षी ढंगं वःगु टिप्पणी थन याना हःगु दु ।

‘पञ्चवर्षीय योजना थें च्वं’

सरकारं हःगु नीति तथा कार्यक्रमयात प्रमुख प्रतिपक्षी नेपाली कांग्रेसं पञ्चवर्षीय योजना थें च्वं धकाः टिप्पणी याःगु दु । नीति तथा कार्यक्रम सामान्यतया दछिया लागिं जक हइगु खःसां थुकी न्यादँया योजना हे अप्वः दुगु जुयाः थ्व पञ्चवर्षीय योजना थें च्वं धकाः कांग्रेसं टिप्पणी याःगु खः । थ्व योजना नं प्रधानमन्त्री केपी ओलीया भाषण थें हे अविश्वसनीय खनेदु धासें अनावश्यक खँ समेत दुथ्याकाः नीति कार्यक्रमया भाषणयात ताःहाकः यानातःगु द्वपं नं कांग्रेसं बिउगु दु । थुकी आपालं खँ बांलाःगु दुथ्याकातःसां उकियात पूवंके फइगु आधार धाःसा छुं हे प्रस्तुत मजूगु टिप्पणी नं कांग्रेसं याःगु दु ।

सम्बन्धित बुखँ

LEAVE YOUR COMMENTS