स्वांयाःपुन्हि हनेत समारोह समिति नीस्वन

येँ(नेपालभाषा टाइम्स)- शान्ति नायक शाक्यमुनि भगवान गौतम बुद्धया जन्म, सम्बोधिज्ञान लाभ व महापरिनिर्वाण प्राप्त यानाबिज्याःगु २५६७ क्वःगु स्वांयाःपुन्हि हनेगु निंतिं तयारी शुरु जूगु दु । थुगुसीया स्वांयाःपुन्हि हनेगु निंतिं आः नकतिनि च्वंगु छगू मुँज्यां २५६७ क्वःगु बुद्धजयन्ती मूल समारोह समिति नीस्वंगु दु ।

थुगुसी स्वांयाःपुन्हि तःजिक हनेगु निंतिं च्वंगु मुँज्यां श्रद्धेय भिक्षु पञ्ञामूर्ति महास्थविरया अध्यक्षताय् मूल समारोह समिति नीस्वंगु खः । वसपोलया अध्यक्षताय् नीस्वंगु समितिइ स्वम्ह उपाध्यक्षय् भिक्षु कोण्डन्य महास्थविर, संघरत्न शाक्य, गुह्यरत्न शाक्य च्वनादीगु दु ।

अथे हे समितिया महासचिवय् भिक्षु पियदस्सी स्थविर, सचिवय् गौतमरत्न शाक्य, सहसचिवय् उज्वल महर्जन, कोषाध्यक्षय् स्वयमकृष्ण मानन्धर व सहकोषाध्यक्षय् भाइराजा मानन्धर च्वनादीगु दु ।

थुकथं हे छवाःयंकं थीथी ज्याझ्वः यासें हनेगु तयारीकथं नीस्वंगु थीथी उपसमितिया संयोजकय् अनागारिका श्रद्धाचारी गुरुमां (धर्मदेशना), गुह्यरत्न शाक्य (अस्थिधातु नगर परिक्रमा), भिक्षु पञ्ञामूर्ति महास्थविर (संयुक्त राष्ट्र संघ परिसर बुद्धजयन्ती), केदार शाक्य (अतिथि सत्कार), भिक्षु कोण्डन्य महास्थविर (स्मारिका प्रकाशन), संघरत्न शाक्य (जेबी पात्रो प्रकाशन), स्वयमकृष्ण मानन्धर (अर्थ संकलन), उज्वल महर्जन (हिदान), सुरेश महर्जन (जलपान), जुजुकाजी महर्जन (खाद्य व्यवस्थापन), भिक्षु नागित (प्रचार प्रसार), भिक्षु शरणंकर (समारोह प्रबन्ध तथा विहार श्रृंगार), भिक्षु दिलभद्र (अस्थिधातु प्रदर्शन), बेटी वज्राचार्य (बौद्ध कवि गोष्ठि) व भिक्षु अस्सजी (स्वयमसेवक परिचालन) कमिटी गठन याःगु दु ।

थुकथं हे सल्लाहकार समितिइ भिक्षु मैत्री महास्थविर, भिक्षु धर्ममूर्ति महास्थविर, भिक्षु भद्दिय महास्थविर, प्रा. सुवर्ण शाक्य, केदार शाक्य, स्वस्तिरत्न शाक्य व शंकरराज सिंह च्वनादीगु दु ।

समारोह समितिं बिउगु जानकारीकथं थुगुसी स्वांयाःपुन्हिया झ्वलय् अस्थिधातु जात्रा नं याइगु जूगु दु । भगवान बुद्धया पवित्र अस्थिधातु स्वदँय् छक्वः नगर परिक्रमा यायेगु याना वयाच्वंगु दु ।