क्यानेडियन नेवाः गुथिया नुगःचुया विषयय् प्रवचन ज्याझ्वः
येँ(नेपालभाषा टाइम्स)÷ क्यानेडियन नेवाः गुथिया ग्वसालय् नुगःचुया विषयय् छगू प्रवचन ज्याझ्वः जुल । गुथिया ग्वसालय् ‘नुगःचुयात गुकथं स्वस्थ याना तयेगु’ धइगु विषयय् प्रवचन ज्याझ्वःयाःगु खः ।
नेपाःपाखें झायादीम्ह वरिष्ठ मुुटु ल्वय् विशेषज्ञ प्रा. डा. सुजीव राजभण्डारीं ज्याझ्वलय् नुगःचुया विषयय् प्रवचन बियादीगु खः । प्रा. डा. राजभण्डारीं विश्वय् दँय्दसं छगू करोड निसें छगू करोड २० गू लख मनू नुगःचुया हे ल्वचं सिनाच्वंगु तथ्यांक न्ह्यब्वयादिसें थुकिया भयावहताया उच्च जूगु खँ कनादिल । छगू अनुसन्धानकथं क्यानाडाय् नं मृत्युया थीथी कारणमध्ये नुगःचुया ल्वचं जुइगु मृत्यु निगूगु कारण जूगु जानकारी बियादिसें थीथी कारणं दक्षिण पूर्वी एशियाय् नं नुगःचुया ल्वय्या जोखिम अप्वया वनाच्वंगु खँ कनादिल ।
नुगःचुया समस्याया थीथी कारणमध्ये उमेर आणुवंशिता, उच्च रक्तचाप, चिनी ल्वय् (मधुमेह), धुम्रपान, कोलेस्ट्रोल इत्यादि कारण जूगुलिं स्वस्थ व सक्रिय जीवनशैली, नसात्वँसा, ब्यायाम आदिं नुगःचुयात स्वस्थ याना तये फइगु प्रा. डा. राजभण्डारीं कनादिल ।
स्वस्थ व सन्तुलित नसात्वँसा ज्वलंया बारे जानकारी बीगु झ्वलय् वय्कलं ज्यनाः, बेलि यायेबलय् देमाय् बछि वाउँचा व सिसाबुसा, बछि रेशायुक्त कार्बोहाइड्रेट व प्रोटिनयुक्त नसाज्वल नल धाःसा उकिं नुगःचुयात स्वस्थ यानातयेत ग्वाहालि याइ धयादिल । लिसें यक्व चिल्लो पदार्थं नुगःचुया धमनीइ समस्या हयाबीगुलिं नुगःचुया ल्वचं कइगु खः धयादिल ।
नुगःचुयात स्वस्थ यानातयेत बजारय् नसाज्वलं न्याः वनेबलय् न्ह्याबलें नं उकी दुगु न्युट्रिसन तालिका स्वयेत, थःगु म्हया तौल व म्हय् वयाच्वनीगु हिउपाःयात नं ध्यान बीमाःगु सुझाव वय्कलं बियादिल । नियमित रुपं थःगु स्वास्थ्य परीक्षण यानाच्वनेत सल्लाह बियादिसें थुकथंया ज्याझ्वः ग्वसाः ग्वःगुलिं गुथियात सुभाय् देछानादिल ।
नायः प्रकाश प्रधानं लसकुस यासें जनचेतनामूलक स्वास्थ्य सूचना प्रवाह यायेगु झ्वलय् थुकथंया ज्याझ्वःपाखें थःगु नुगःचुया स्वस्थ यानातयेत ग्वाहालि जुइगु विश्वास प्वंकादिल ।
न्वकु उत्तम माकःजुं ज्याझ्वःया स्रोत व्यक्ति प्रा. डा. राजभण्डारी नुगःचु ल्वय्या ख्यःया इलेक्त्रोफिजियोलोजिइ दखल तयादीम्ह व प्राध्यापन व अनुसन्धानात्मक कृतित पिथनादीगु जानकारी बियादिल ।
गुथिया मूछ्याञ्जे विमल श्रेष्ठं सुभाय् देछासे नुगःचुयात स्वस्थ याना तयेगु बारे सरल व स्पष्ट रुपं प्रवचन बियाः उपस्थित जुयादीपिनिगु जिज्ञासायात सहज रुपं लिसः बियादीगुलिं ज्याझ्वः सफल जूगु तायेका धयादिल ।
LEAVE YOUR COMMENTS