युभेन्टसयात १६ अंकया अग्रता, लिभरपुल बराबरीइ, एथ्लेटिको त्यात

इटालियन सिरी ए अन्तर्गत जूगु कासाय् शीर्ष थासय् लानाच्वगुं युभेन्ट्सं निगूगु थासय् च्वगुं नापोलीयात बुकूगु दु । युभेन्टसं नापोलीयात वयागु हे मैदानय् २–१ गोलं बुकूगु खः । युभेन्टसं कासाया न्हापागुं हाफय् निगू गोल याःगु खःसा नापोलीं निगूगु हाफय् छगू जक गोल याःगु खः । थ्व कासाय् निगुलिं टिमया कासामिं छगू छगू ह्याउँगु कार्ड नं नल ।

कासाया २५ औं मिनेटय् नापोलीया गोलकिपर एलेक्स मरेटं क्रिष्टियानो रोनाल्डोयात फल तयेवं तप्यंक हे ह्याउँगु कार्ड बिउगु खःसा युभेन्टसयात फ्रि—किक नं बिउगु खः । कासाया २८ औं मिनेटय् मिरालेम पियानिजं फ्रि—किकय् गोल याःगु खः । न्हापांगु हाफया ३९ औं मिनेटय् इम्रे क्यानं गोल यानाः युभेन्टसयात निगू गोलया अग्रता बिउगु खः ।

निगूगु हाफया ४८ औं मिनेटय् युभेन्टसया पियानिजं निगू म्हासुगु कार्ड नयेवं निगुलिं टिम झिम्ह कासामिइ सीमित जूगु खः । कासाया ६१ औं मिनेटय् जोसे कालेजोनं नापोलीया निंतिं छगू गोल याःगु खः । कासाया अन्तिम इलय् पेनाल्टीया अवसर वःगु खःसां लारेजाें पेनाल्टी मिस यायेवं नापोलीं पराजय फयेमाःगु खः ।

नापोलीयात बुकेवं युभेन्टसं ल्याः धलखय् १६ अकं अग्रता काःगु दु । थ्व विजय लिपा उत्कृष्ट कासा म्हिताच्वंगु युभेन्टसयात उपाधी त्याकेत अझ अःपूगु दु । शीर्ष थासय् लानाच्वंगु युभेन्टसया ७२ अकं दुसा निगूगु थासय् लानाच्वंगु नापोलीया ५६ अकं दु । सिरी ए य् आः युभेन्टसं १२ गू कासा जक म्हिते ल्यंदनि ।

उखे इग्लिस प्रिमियर लिगय् लिभरपुलं एर्भटनलिसे बराबरी म्हितूगु दु । एर्भटनया मैदानय् जूगु कासाय् लिभरपुलं एर्भटनयात दबाबय् तःगु खःसां गोल यायेमफयेवं गोलरहित बराबरीइ चित्त बुझे यायेमाःगु खः । एर्भटनया गोलकिपर जोर्डन पिकफोर्ड लिभरपुलया निंतिं बाधक जुयाबिल । थ्व कासा बराबरी जुइवं लिभरपुल शीर्ष थासय् थहां वने मफुत ।

समान कासा म्हिताः शीर्ष थासय् दुगु म्यानचेस्टर सिटीसिबें लिभरपुल छगू अंकं जक लिउने दु । म्यानचेस्टर सिटीया ७१ अकं दुसा लिभरपुलया ७० अंक दु । स्वंगूगु थासय् लानाच्वंगु टोटनह्यामया ६१ अकं दु । प्रिमियर लिगया मेगु कासाय् चेल्सीं फुलह्यामयात २—१ गालं बुकूगु दु । चेल्सीया निंतिं हिग्विन व जर्जिनाें गोल याःगु खःसा फुलह्यामपाखें च्यामर्बसं गोल याःगु खः ।

अथेहे स्पेनिस ला लिगाय् एथ्लेटिको म्याड्रिडं रियल सोसिडाडयात २–० गोलं बुकूगु दु । एथ्लेटिकोया निंतिं चेल्सीं लोनय् वःम्ह अलबारो मोराटाें निगुलिं गोल याःगु खः । मोराटों स्वंगू मिनेट दुने निगू गोल याःगु खः । न्हापागुं हाफया ३० औं व ३३ औं मिनेटय् मोराटो गोल याःगु खः ।

कासाया ६२ औं मिनेटय् कोकें ह्याउँगु कार्ड नयेवं एथ्लेटिको झिम्ह कासामिइ सीमित जूगु खःसां सोसिडाडं उकिया फाइदा काये मफुत । निगूगु थासय् च्वगुं एथ्लेटिको म्याड्रिडयात ५३ अंक थ्यंगु दु । शीर्ष थासय् लानाच्वंगुु बार्साया ६० अंकं दु । रियल म्याड्रिड ४८ अंक सहित स्वंगूगु थासय् दु