‘बेलं याकनं रियल म्याड्रिड त्वःती’

गारेथ बेलं याकनं हे रियल म्याड्रिड त्वःतीगु खँ क्लबया प्रशिक्षक जिनेदान जिदानें धाःगु दु । अमेरिकाया होस्टनय् ब्रायन म्यूनिख लिसे ३–१ गोलं पराजित जुइधुंकाः रियलया प्रशिक्षक जिदानें ३० दँया बेलं याकनं रियल त्वःतेत्यंगु खँ धयादीगु खः । बेलया रियल लिसे मेगु स्वदँया सम्झौता दनी, तर रियल धाःसा आः हे बेलयात क्लबं पितिनेत स्वयाच्वंगु दु ।

‘जितः आशा दु वं याकनं क्लब त्वःती, थ्व सकसियां निंतिं बांलाःगु हे जुइ । जिपिं न्हूगु टिमय् वयागु ट्रान्स्फरया निंतिं ज्या यानाच्वनागु दु’ धासें जिदोनं धाःगु दु, ‘जितः व्यक्तिगत रुपं वयालिसे छुं समस्या मदु । तर गुबलें गुबलें ई स्वयां न्ह्यव हे यायेमाःगु ज्या वइ ।’

मेखे बेलया एजेन्ट जोनाथन बार्नेटं एएफपीलिसे खँ ल्हासें जिदानें बेलया अपमान याःगु धासें धाःगु दु, ‘जिदानें रियलया निंतिं महत्वपूर्ण योगदान बिउम्ह कासामियात सम्मान तकं मयाः ।’सन् २०१३ य् टोटनह्यामं ८५ मिलियन पाउण्डं रियल म्याड्रिड वयेधुंकाः बेलं प्यक्वः तक च्याम्पियन्स लिग त्याकेधुंकूगु दु ।

आः बेल प्रिमियर लिग क्लब म्यानचेस्टर युनाइटेड वा टोटन्हयाम, जर्मनी क्लब ब्रायन म्युनिख वनेफु धाःसा । मखुसा चाइनिज सुपर लिग म्हितेगु निंतिं नं वनेफु धाःगु दु ।

वेल्सया कासामि बेल घाःपाःया समस्याय् लानाच्वंगु दु । थ्वहे कारणं वंगु प्यंगू सिजनय् वं ला लिगाय् मुक्कं ७९ गू कासा जक म्हितल । लस ब्लांकोया प्रशिक्षणय् वं मुक्कं ४२ गू कासा जक म्हितल, गुकी बच्छि ला सब्स्टिच्युटय् म्हितूगु खः । वंगु सिजनय् क्लबया समर्थकतय्सं नं बेलप्रति असन्तोष प्वंकूगु खः ।

सम्बन्धित बुखँ

LEAVE YOUR COMMENTS