विश्वकप पुलुपालु

हाकनं कासा म्हितकेत माग

विश्वकप–२०१८ करिब लिपांगु चरणय् थ्यनाच्वंगु दु । कासा सिधयेत आः छुं दिं व छुं कासा जक ल्यं दनि । थ्व झ्वलय् छगू कासा हाकनं म्हितकेमाःगु माग जूगु दु । रसिया विश्वकप प्रि क्वार्टरफाइनल अन्तर्गत वंगु मंगलवाः इंग्ल्याण्ड व कोलम्बिया दथुइ जूगु कासा जूगु खः । उगु कासा इंग्ल्याण्डं ट्राइब्रेकरय् कोलम्बियायात बुकाः क्वार्टरफाइनलय् दुहां वंगु खः ।

थुपिं निगू देय्या दथुइ जूगु कासा हाकनं म्हितकेमाःगु माग जूगु दु । कोलम्बियाया झण्डै स्वंगू लख समर्थकं उकथं माग याःगु खः । २ लाख चय्द्वः कोलम्बियाली समर्थकं ल्हाःचिं तयाः इंग्ल्याण्ड व कोलम्बिया दथुइ हाकनं कासा म्हितकेमाःगु माग यासें फिफाया निवेदन तकं बिउगु दु ।

ट्राइब्रेकरय् बुइवं तम्वःपिं कोलम्बियाली समर्थकतय्सं फिफाया ‘फेयर प्ले’ नियमकथं कासा म्हितकेमाःगु माग यासें इमिसं उकथं ल्हाःचिंसहित निवेदन बिउगु खः । निगूगु हाफय् इंग्ल्याण्डयात पेनाल्टी मखुसां फाउल बिउगु धासें रेफ्रीया निर्णय निष्पक्ष मजूगु कोलम्बियाली समर्थकतय् दावी दु । उगु कासाय् कोलम्बियां न्हापां अग्रता काःगु खःसा लिपा इंग्ल्याण्डं व हे पेनाल्टीपाखें कासा १–१या बराबरी याःगु खः ।

तुतांया भरय् प्रशिक्षण

जब कासामिं बल विपक्षी पोष्ट न्ह्यःने यंकी, गोल याइ अथवा असफल जुइ वा खराब प्रदर्शन याइ अबलय् दक्वं थें टीमया प्रशिक्षकं थःगु निर्देशन बी ।

थथे निर्देशन बियाच्वनीगु इलय् अप्वःथें क्यामराय् दुने लाइम्ह छम्ह प्रशिक्षक खः ओस्कार वाशिंगटन ताबरेज । रसियाय् जुयाच्वंगु विश्वकप फुटबल छिं मदिक्क स्वयाच्वनादीगु दुसा उकी ताबरेजं तुतां चुयाः कासामियात निर्देशन बियाच्वंगु खंकादी ।

ताबरेज निक्वःतकया उपाधि विजेता नापं दक्षिण अमेरिकी देय् उरुग्वेया प्रशिक्षक खः । उमेरं ७१ दँ दयेधुंकूम्ह ताबरेज प्रखर आलोचककथं म्हसिउ । फुटबलय् वये न्ह्यः प्राथमिक विद्यालयया शिक्षक ताबरेजयात निगू दशक न्ह्यः ‘गुलेन बार सिन्ड्रोम’ जूगु खः । थुगु ल्वचं कःपिनिगु मांसपेशी कमजोर जुयाः सासः ल्हायेत तकं थकुइ ।

लिपांगु इलय् ताबरेजया स्वास्थ्यय् तसकं समस्या जुइवं वं तुतांया ग्वाहालि कायेगु याःगु खः । उकिं ताबरेज मैदान पिने जुइमा वा थुने तुतांया ग्वाहालिं उखेथुखे जुयाच्वनी । कोलम्बिया, अर्जेन्टिना, इटाली, स्पेनया ततःधंगु क्लबया तकं प्रशिक्षक जुइधुंकूम्ह ताबरेज सन् २००६ निसें उरुग्वेया प्रशिाक खःसा वयागु हे प्रशिक्षणय् उरुग्वें प्यक्वःथतक विश्वकपया यात्रा यायेधुंकूगु दु ।

विश्वकप रुसय्, बहस चीनय्

रसियाय् जुयाच्वंगु विश्वकप कासाया कारणं जक मखसे अनेक कारणं नं चर्चाय् वयाच्वंगु दु । खतुं विश्वकपया चर्चा जुइगु सामान्य हे खः ।
तर रुसय् विश्वकप जूसां अन जूगु घटनायात कयाः झीगु उत्तरी जःलाखःला देय् चीनय् धाःसा तसकं तःधंगु हे बहस जुयाच्वंगु दु ।

विश्वकप फुटबलया रिपोर्टिङ टेलिभिजनय् प्रत्यक्ष प्रशारण जुयाच्वंगु इलय् हे खेल पत्रकारतय्त चुप्पा नइगु घटायात कयाः थ्व इलय् चिनिया सामाजिक संजालय् बांलाक हे बहस जुयाच्वंगु दु ।

विशेष यानाः मिसा पत्रकारतय्त चुप्पा नइगुयात यौन हिंसाया रुपय् बहस जूसां मिजं पत्रकारतय्त मिसातय्सं चुप्पा नइगुयात धाःसा सामान्य घटनाया रुपय् काःगु खँय् ब्यापक बहस जुयाच्वंगु दु ।