रुस निगूगु चरणय् थ्यनीगु पक्का
येँ- ग्वसाः देय् रुस निगूगु चरणय् दुहां वनीगु थ्यमथ्य पक्का जूगु दु । वंगु चान्ह्य क्वचाःगु कासाय् इजिप्टयात ३-१ गाेलं बुकुसें रुस निगूगु चरणया लुखाय् थ्यंकःवःगु खः । थाै जुइगु कासाय् उरुग्वे नं सउदी अरबयात बुकल धाःसा रुस व उरुग्वे निगुलिं निगूगु चरणय् दुहावनी । यदि सउदी त्यात धाःसा जक रुस मेगु निगूगु चरणय् दुहा वनीगु जुइ । अय्सां गाेल अन्तरया ल्याखं धाःसा रुस निगूगु चरणय् थ्यन हे धाःसां जिउ । थ्वयां न्ह्यः न्हापांगु कासाय् सउदी अरबयात ५-० गाेलं बुकूगु रुसया निगू कासा लिपा च्यागू गाेल थ्यनेधुंकूगु दु । इजिप्ट लिसेया कासा त्यायेवं रुस ६ अंक सहित शीर्षस्थानय् दु । इजिप्ट धाःसा थुगुसी विश्वकपं पिने लाःगु न्हापांगु टिम जूगु दु ।
वंगु चान्हय् जूगु कासाय् रुसं कासाया ४७ अाै मिनेटय् अहमद फातीया अात्मघाती गाेलया ग्वाहालिं अग्रता काःगु खः । थ्वयां १२ मिनेट लिपा डेनिस चेरसेभ गाेल यासें अग्रता दाेब्बर या:गु खः । चेरसेभं थ्व गाेल लिसे पाेर्चुगलया राेनाल्डाे लिसे बराबरी याःगु दु । निम्हेसियागुं जारी विश्वकपय् स्वंगू स्वंगू गाेल थ्यंगु दु । चेरसेभया गाेलया स्वंगू मिनेट लिपा हे डिज्युबां थप छगू गाेल यासे रुसया विजय सुनिश्चित याःगु खः । इजिप्टया निंतिं माेहम्मद सलाहं कासाया ७३ अाै मिनेटय् छगू जक सान्त्वना गाेल याःगु खः ।
LEAVE YOUR COMMENTS