फ्रान्स, जर्मनी व पोर्चुगल निगूगु चरणय्

येँ – फ्रान्स, जर्मनी व पोर्चुगल युरो कपया निगूगु चरणय् दुहां वंगु दु । ग्रुप अफ डेथ धाइगु स मूह एफया बिहिवाः चान्हय् जूगु निगुलिं कासा बराबरीइ क्वचायेवं स्वंगुलिं दावेदार टिम निगूगु चरणय् दुहां वनेत ताःलाःगु खः ।

विश्व विजेता फ्रान्स व युरो विजेता पोर्चुगल दथुया कासा २–२ गोलया बराबरी जूगु खःसा जर्मनी व हंगेरी दथुया कासा नं बराबरीइ क्वचाःगु खः । थ्व समूहया अन्तिम कासा निगुलिं बराबरीइ क्वचायेवं फ्रान्सं ५ अंक सहित शीर्षस्थानय् दुसा गोलअन्तरया ल्याखं पोर्चुगल स्वयां च्वय् च्वनाः जर्मनी निगूगु चरणय् दुहां वंगु खः । पोर्चुगल स्वंगूगु थासय् लाःगु खःसां उत्कृष्ट स्वंगूगु थासय् लाःगु टिम जुयाः निगूगु चरणय् दुहां वंगु खः । युरो कपया नियम कथं स्वंगूगु थासय् लाःगु प्यंगू उत्कृष्ट टिम नं निगूगु चरणय् वनी ।

फ्रान्स व पोर्चुगल दथुइ नाटकीय कासाय् स्वंगू गोल पेनाल्टि पाखें जूगु खःसा छगू गोल जक करिम बेन्जामां बक्स दुनें प्रहार यानाः याःगु खः ।

कासाया ३० औं मिनेटय् रोनाल्डों पेनाल्टि पाखें गोल यासें पोर्चुगलयात अग्रता बिउगु खः । तर थ्व पेनाल्टि धाःसा विवादास्पद जूगु दु । फ्रान्सया गोलकिपरं बल पञ्च यायेत स्वःबलय् पोर्चुगलया कासामिया छ्यनय् हे लाःगु खः । तर न्हापां बलय् प्रहार जूसां फ्रेञ्च गोलकिपरयात म्हासुगु कार्ड नकाः पेनाल्टि बिउगुलिं थ्व पेनाल्टिइ न्ह्यसः दंगु खः ।

तर न्हापांगु हाफया इन्जुरी इलय् फ्रान्सयात नं पेनाल्टिया ह्वःताः वलसा करिब बेन्जमां थुकी गोल यात । निगूगु हाफय सुरु जूगु निगू मिनेट लिपा हे बेन्जमां मेगु गोल यानाः फ्रान्सयात अग्रता बिल, तर कासाया ६० औं मिनेटय् पोर्चुगलयात हाकनं पेनाल्टिया ह्वःताः वलसा उकियात रोनाल्डों गोल यात ।

मेखे जर्मनी व हंगेरी दथुया कासाय् हंगेरीं निक्वः तक अग्रता काःगु खःसां कासा बराबरीइ क्वचायेवं हंगेरी धेंधेंबल्लाखं पिने लाःगु दु ।