ने. सं. ११४४ चौलाथ्व द्वादशी -

धन्यवाद धुर्मुस सुन्तली !

समाजसेवा, राजनीति । निगूयां लक्ष्य । जनताया कल्याण, हित खः । जुइ । तर । इमि प्रकृति पाः । गाक्कं पाइ । राजनीतिज्ञतय्सं धाइ, ‘जिपिं जनताया नोकर । जनताया सेवा हे जिमि आजु । जनताप्रति जिपिं सदां समर्पित ।’ समाजसेवीपिनि चिउताः नं जनताया सेवा हे जुइ । विशेष यानाः दीन दुःखीतय् । कमजोर वर्गतय् ।

राजनीतिज्ञतय् जनसेवाया माध्यम शक्ति जुइ । राजनीतिज्ञतय्सं उकिं शक्तिया आर्जन यायेत स्वइ । चुनावय् दनी । अनेक तिकडम यानाः जूसां शक्तिइ वइ । वयेत स्वइ । अले । जनताया सेवाया नामं राजनीति म्हिती। राजनीति याइ । तर समाजसेवीतय् जनसेवाया लिधंसा थःगु मनोबल जुइ । नैतिक चेतना । अन्तर्आत्मा जुइ ।

शक्ति संचय यायेगु कासाय् समाजसेवी दुनी मखु । जनताप्रति सेवा निःस्वार्थ भावं याइ । यायेमाः । इमान्दारीता हे समाज सेवाया आकर्षण जुइ । सैद्धान्तिककथं थथे खयानं व्यवहारय् खँ पानाच्वनी । गुलिखे कथित समाजसेवीतय्सं समाजसेवाया ख्वाःपाः पुनाः निकृष्ट राजनीति म्हिताच्वनी । घृणित राजनीतिक चाल छ्यला च्वनी ।

शक्ति केन्द्रया मतियार जुयाः थःगु गुह्य महत्वकांक्षा पूरा यानाच्वनी । अथे हे । गुलिखे राजनीतिज्ञतय्सं थःत समाजसेवीकथं प्रस्तुत यानाः थःगु साधुपन प्रदर्शन यानाच्वनी । जनतायात ध्वं लानाच्वनी । तर दुनें दुनें थःगु राजनीतिक अभिष्ट पूवंकाच्वनी । थौं देशय् थज्याःगु हे कथित समाजसेवाया अभिनय व नाटकं जनतायात भ्रम जालय् क्यंकाच्वनी ।

नांजाःपिं हास्य कलाकार धुर्मुस व सुन्तली निम्हतिपू । थौंकन्हय् समाजसेवीकथं इमि तसकं नां च्याना वयाच्वंगु दु । भुखाचं पीडित जूपिंत वास थनाः इपिं निम्हतिपुलिं पीडिततय्त सेवा यात । थुकिया निंतिं इपिं प्रशंसाया पात्र जुल । सम्मानित जुल । गांगामय् वनाः प्राकृतिक प्रकोपं पीडित जनतायात ग्वाहालि यायेगु समाजसेवा खः ।

झीगु थेंज्याःगु गरिब, विभेद, कुसंस्कारं ग्रस्त, अभाव व पीडित जनताया निंतिं याये माःगु सेवाया चुनौति अल्याख दु । सचेत समाजसेवीं जनतां फयेमाःगु कठिन समस्यात पहिचान याये फयेकेमाः । धरहरा दयेकेगु, भ्यू टावर थनेगु, विशुद्ध समाजसेवीतय् ज्या जुइ फइमखु ।

थुकी छुं शंका याये फइमखु । समाजसेवाया थ्व धाथें नं छगू स्यल्लाःगु नमूना जुइ । तर थौंकन्हय् धुर्मुस व सुन्तलीया समाजसेवां न्हूगु मोड कया हयाच्वंगु थें च्वं ! इपिं आः स्वनिगलं पिने भरतपुरपाखे भव्य क्रिकेट स्टेडियम दयेकेगु महान् समाजसेवाय् समर्पित जुइ । बुखँ पिहां वइ । खूब प्रचार प्रसार जुइ ।

थःगु थ्व समाजसेवा शानदारकथं पूवंकेत धुर्मुस व सुन्तलीं आः देश विदेशं चन्दा संकलन यायेत्यंगु दु । अर्बौं दां मुनेत्यंगु दु । लसताया लहर न्ह्याइ । खः । भव्य स्टेडियम देशय् दयेकेगु बांलाःगु विकासया ज्या खः । थ्वया थःगु हे थासय् महत्व दु । तर थन छता न्ह्यसः कथुइ क्वँय् थाःथें दनाच्वनी ।

धुर्मुस व सुन्तलीया स्टेडियम निर्माणया महान ज्या छु सही समाजसेवा खःला ? विशुद्ध समाजसेवाया परिभाषा दुने थ्व लाः ला ? थौं जनता थ्व खँय् दिग्भ्रमित जुयाच्वंगु दु । युट्युबय् डा. युवराज संग्रोलां ला थ्व खँय् तप्यंक स्पष्ट रुपं धाःगु न्यने । ‘थज्याःगु स्टेडियम निर्माणया ज्या राष्ट्रं पूवंकी । समाजसेवीतय् सरोकारया विषय मखु ।’

विश्वय् महान् समाजसेवीतय् स्मरण जुइ । इमिगु चिउताः, समर्पण गज्याःगु खँय् जुइ ? गुगु वर्ग, गज्याःगु मुद्दाया निंतिं जुइ । थ्व सीके फइ । झीगु थेंज्याःगु गरिब, विभेद, कुसंस्कारं ग्रस्त, अभाव व पीडित जनताया निंतिं याये माःगु सेवाया चुनौति अल्याख दु । सचेत समाजसेवीं जनतां फयेमाःगु कठिन समस्यात पहिचान याये फयेकेमाः ।

धरहरा दयेकेगु, भ्यू टावर थनेगु, विशुद्ध समाजसेवीतय् ज्या जुइ फइमखु । महान् समाजसेवी मदर टेरेसां जनताया गुगु स्तरय् वयाः सेवा यात समाजसेवीतय्सं सीकेमाः । पक्का समाजसेवीतय् जीवनी ब्वनेमाः ।धुर्मुस, सुन्तलीपिंसं तःजिगु कार्यक्रम यानाः थःगु स्टेडियम दयेकेगु समाजसेवाया घोषणा याइ । घोषणा कार्यक्रम कमरेड पुष्पकमल दाहाल, प्रम ओलीया उपस्थितिं झःझः धाइ ।

कार्यक्रमय् हास्यकलाकार मदनकृष्णजुं नं न्वचु बियादिल । देशय् प्यखेरं भ्रष्टाचार जुयाच्वन । मदनकृष्णजुं विना हिच्किचाहट प्रष्ट यानादिल । वय्कःया आसय म्येँ हालामि पशुपतिया ‘भ्रष्टाचार लुट’ म्ये पाखेर चिन्तित खनेदु । दुःखया खँ । थौं भ्रष्टाचारया खँ ल्हाक्व फुक्क कांग्रेस जुइ । आः मदनकृष्णयात नं कांग्रेस धाइगु खः ला ? मसिउ ग्व ?

डा. गोविन्द केसीं आम जनताया निंतिं स्वास्थ्योपचार सर्वसुलभ जुइमाः धाल । वयात नं कांग्रेस धाल । खः । कांग्रेसं जनतायात पम्प तयाः मौकाय् चौका ह्वाइ । थ्व खेल राजनीतिक जुयाच्वनी । तर सरकारं मुद्दाया गाम्भिर्यतायात विचाः यायेमाः । औचित्यपाखे चिउताः तयेमाः । आम जनताया दुष्टिं मुद्दाया मूल्यांकन यायेमाः ।

धुर्मुस, सुन्तलीं तामझामकथं थःगु समाजसेवा न्ह्याकूगु दु । वय्कःपिंत भिंतुना । बधाइ । तर वय्कःपिनिगु कुतः राजनीतिकरणं ग्रस्त मजुइमा । ध्वस्त मजुइमा । छता खँय् धुर्मुस, सुन्तलीयात काठमाडौंवासीतय्सं धन्यवाद बी । नवनिर्मित स्टेडियम स्वनिगलं पिने दयेकाः धुर्मुस, सुन्तलीं स्वनिगःयात तःधंगु गुण याःगु दु । स्वनिगलं फये मफुगु आन्तरिक भारं मुक्त याःगु दु ।