संविधान संशोधन यायेमाली ….. ?

भाजुं कनी । न्यँन्यं वने । नुगलय् थी । धया यंकी । ‘पाकिस्तानी राष्ट्रपतिं थःगु देय्या आर्थिक स्थितिया चिउताः तयाः राष्ट्रपति भवनयात हे बालं बीगु क्वःछित ।’ देय्या राष्ट्रपति महलय् च्वनेमाः । सुख सुविधा, तामझामं घेरे याकाः मनमोजी जीवन हनेगु राष्ट्रपतिया अधिकार खः । पाकिस्तानी राष्ट्रपतिं थज्याःगु विलाशीता जीवनपाखें थःत तापाकी । देय्या आर्थिक जीवनयात थकायेत सुख सुविधाया महत्वकांक्षी जुइ मजिउ धइगु सन्देश बी ।

तर नेपालय् धाःसा ठीक अःखः । ततःधंगु पदय् थ्यंकेगु । अधिकतम सुख सुविधा राज्यपाखें उपभोग यायेगु । आलिशान महलय् च्वनेगु, करोडौं वंगु गाडी गयेगु । देय्या आर्थिक स्थिति छु, गय्, गथे ? गन थ्यन ? उकिया चिउताः, चिन्ता ? फुक्क हे ह्वतय् । मतलब शुन्य । थ्व हे कारणं देशय् थौं अनेक पद प्रतिष्ठाय् थ्यंकेगु होडबाजी नेपाली राजनीतिया नेतातय् मूल उद्देश्य जुइ । देय्या विकास, उत्थानया नारा जनतायात क्यनेगु वा जक खः । देय्या नेतातय् । इमिगु आज्जु, लक्ष्य, शक्ति प्राप्ति खः । गुगुंकथं नं । शक्ति प्राप्ति लिपा स्वतन्त्र रुपं थःगु हालिमुहालि यायेगु उद्देश्यं हे थौं देय्या नेतातय्सं राजनीतिक खेल म्हिताच्वनी ।

भाजुं खँ न्ह्याकी । धाइ । ‘स्वयादिसँ ! एमालेया निम्ह नेता ओली व माधव दथुइ खँ ल्हाकेगु ग्वसाः ग्वइ । तःधंगु होटलय् ! अहो ! गज्याःगु तामझाम ! गुलि गाडी ! एकसे एक थिकेगु ! अनया वातावरण स्वयेबलय् ला अमेरिकी राष्ट्रपति व रस्साया राष्ट्रपति दथुइ जुइत्यंगु शीर्षस्थ वार्ता थें च्वं ! गज्याःगु तयारी ! गपाय्सकं मनूतय् लस्कर ! मानौं अन जुइत्यंगु वार्ता देय् व जनताया निंतिं उच्चस्तरीय वार्ता खः । तर । यथार्थय् । व फुक्क तामझाम मात्र वार्ताय् संलग्न नेतातय् रवाफ जक खः । थःत अतिकं दामी नेता खंकीपिनि अहंकार जक खः । महान् रुप ब्वयेगु दुस्साहस जक खः । असभ्य, क्षुद्र भाय् छ्यलाः खिचा ल्वाःथें ल्वाइपिं नेतातय् वार्ता भव्य होटलय् तामझामाया वातावरणय् छाय् सम्पन्न यात ? थुकिं सिद्ध जुइ थौं देय्या नेतात गुलि रवाफी, गुलि शानदार ? थौं निम्ह नेतातय् ल्वापुं एमाले पार्टी धरापय् लायेधुंकल । अझ देय्या राजनीतिक स्थिति हे अन्योलय् लायेधुंकूगु दु । नेतातसें राजा महाराजातय् शैलीं थःगु शान क्यना वयाच्वंगु दु ।’

भाजुया खँ जितः तसकं पाय्छि ताल । हरेक पार्टीतय् पार्टी कार्यालयय् जुइगु, बैठकत टि.भी. खनीगु दृश्यत लुमना वल । पार्टी मिटि·य् वइपिं नेतात करोडौं वंगु गाडीइ वइ । पार्टी कार्यालयय् अनेक मूल्यवान चिल्लो गाडीत वयाच्वनी । मानौं व पार्टीत अमेरिकाया डेमोक्र्याटिक, रिपब्लिकन पार्टी खः । आर्थिक दृष्टिं गरिब देय्या पार्टी थुपिं गथे जुइ फइ ? देय् आर्थिक दृष्टिं कमजोर तिनि । अधिकांश जनता आर्थिक जर्जरतां पीडित तिनि ।

देय्या जनताया आर्थिक दूरावस्थायात ध्यानय् तयाः फयांफक्व सरल जीवन हनेमाःपिं नेतात । अःखः राज्यया धुकुतिंइ निर्मम दोहन यानाः करोडौं वंगु गाडी गयाः शानदार जीवनशैली नालाच्वनी । म्हुतुं गरिबी अन्त्यया भजन हालाच्वनी । समाजवाद अझ साम्यवादया शंख पुयाच्वनी । तर थौंया नेतात धाथें कर्मं थःगु भजनप्रति इमान्दार जू ला ? पाकिस्तानी राष्ट्रपतिं जनताया लागि राष्ट्रपति भवन हे समर्पित यात । तर । थन धाःसा राष्ट्रपति जुइ । शानदार महलय् च्वने दइ । करोडौं वंगु गाडी गये दइ । मोज याये दइ । धइगु उद्देश्यं हे राष्ट्रपतिया निंतिं अनेक टिकडम म्हिती ।

थौंकन्हय्या राजनीतियात विश्लेषण यानाः भाजुं सार कनी । तसकं रोचक । जिं न्यना च्वने । भाजुं धाल, ‘थौं देशय् संसद विघटन व प्रतिस्थापनया घटनां राजनीतिइ तःधंगु प्रभाव हल । संसद न्यादँया लागिं खः । तर ओलीं संसदयात निदँ लिपा हे विघटन यानाबिल । विघटनया चौतर्फि विरोध जुल । एमाले दुने माधव नेपालं संसद न्यादँया खः । थुकियात विघटन यायेगु असंवैधानिक खः धाइ । विरोधी दलत मुनाः संसद प्रतिस्थापनया निंतिं सर्वोच्चय् वनी । सर्वोच्चं संसद पुनःस्थापन याइ । संसद न्यादँया जुइ ।

थ्व न्यादँ हे न्ह्यायेमाः । माधवं थ्व विश्वास ज्वनी । प्रतिपक्ष कांग्रेसयात भोट बियाः सरकार दयेकी । लिच्वः गठबन्धनया सरकार गठन जुइ । तर थ्व राजनीतिक विकासं नेपाःया राजनीतिया छगू गम्भिर तथ्ययात संकेत याइ । खः, संविधानकथं संसदया आयु न्यादँ । बहुमत प्राप्त प्रधानमन्त्री न्यादँतक प्रम जुइ फइ । तर देय्या राजनेतातय् चरित्रं थन न्यादँतक अटुट प्रम जुइ दइगु परिस्थिति वये फइमखु । एक सय एक नेतात । इमिके न्यादँतक शक्तिं पिने च्वनाः सुं प्रम न्यादँतक प्रम पदय् च्वंगु टुलुटुलु स्वया च्वनेगु धैर्य दइमखु ।

थन नेता जुइगु हे शक्तिया लागि । विना शक्ति नेतात पागलसम जुइ । उकिं शक्तिहीन मखुपिं नेतातय्सं राजनीतिक खेल शुरु याइ । सत्तासिन नेतातय्त क्वफाइ । थ्व हे देय्या राजनीतिक परम्परा जुइ । उकिं संविधान हे संशोधन यानाः देय् संचालन आः गठबन्धन सरकारं यायेमाःगु संवैधानिक व्यवस्था यायेमाः, ताकि फुक्क दलतय्त शक्तिया भागबन्डा दइ । शक्तिं पिने लातकि वँय् चाइपिं नेतातय् संवैधानिक उपचार थ्व हे जुइ । संविधान संशोधन यायेमाली ।