सही श्रद्धाञ्जली

अबलय् जिपिं त्रि–चन्द्र कलेजय् । स्नातक तगिमय् । ताहाचलया दरवार कलेज विघटन जुइ । अनया शिक्षक, विद्यार्थीत दक्व त्रि–चन्द्र कलेजय् हइ । दरवार कलेजय् नेपालभाषाया प्राध्यापक जनकलाल सर । वय्कः नं त्रि–चन्द्र कलेजय् सरुवा जुइ । ब्वंकः झाइ । अबलय् त्रि–चन्द्र कलेजय् नेपालभाषाया विद्यार्थी पद्मरत्न तुलाधर, हितकरवीर सिं कंसाकार, विश्वकेशर मास्केपिं खः ।

नेपालभाषा भर्नाकुलर जिगु नं विषय । डा. जनकलालजुं अबलय् जिमित नेपालभाषा ब्वंकादीगु । वय्कः जिमि गुरु । लिपा जि स्वयं त्रि–चन्द्र क्याम्पसय् नेपालभाषा विभागय् प्राध्यापनया निंतिं वया । गुरु डा. जनकलाल वैद्यया मातहतय् च्वनाः ज्या याना । शायद स्वीदँ तक हे जुइमाः ।

स्वीदँ तक नापं च्वनाम्ह गुरु जनकलालजु बारे छुं सकिेगु अवसर जितः दत । छगः आखः ग्वलं वय्कःया व्यक्तित्वया विशेषता बारे न्ह्यथनेगु खःसा वय्कः विशुद्ध प्राज्ञिक पुरुष खः । विश्वविद्यालय, क्याम्पस, कलेज धइगु मूलत प्राज्ञिकस्थल खः । ज्ञानया पवित्रस्थल खः । ज्ञानभूमि विश्वविद्यालयस जब राजनीति हावी जुइ थ्वया प्राज्ञिक पक्ष ¥हास जुइ । राजनीतिक तिकडम म्हितेगु ख्यः जुइ । थौं विश्वविद्यालय, कलेज धायेबलय् प्राज्ञिक संस्था स्वयां राजनीतिक दलतय् लुछाचुँडया केन्द्र खनेदइ ।

डा. जनकलाल वैद्यजुं थःगु प्राध्यापन पेशायात छगू गहन साधना, ध्यानकथं थुइकादिल । अथे हे दत्तचित्त मनं फत्तले सदां थःगु प्राज्ञिक साधनाय् जीवन पानादिल । वय्कःयाके थःगु प्राज्ञिक स्वार्थं पिने अन्य गुगुं इतर महत्वकांक्षा छुं दु थें मच्वं । शायद थ्व हे कारणं जुइ वय्कः थःगु सरल प्राज्ञिक जीवन न्ह्याकेत सफल जुल ।

डा. जनकलाल वैद्य प्राध्यापकया रुपय् जक न्ह्यथनेबहम्ह व्यक्तित्व मखु । नेपालभाषा ख्यलय् छम्ह स्यल्लाःम्ह अनुसन्धाता नं खः । वय्कलं नेपालभाषाया श्रीवृद्धिया निंतिं समीक्षा, इतिहास, बाखंया ख्यलय् नं महत्वपूर्ण योगदान बियादीगु दु । वय्कलं नेपालभाषाया पुलांम्येँयात कयाः पीएचडी यानादिल । गुगु नेपालभाषाया ख्यलय् पुलांम्येँया विषयय् अध्ययन अनुसन्धानया खँय् अद्वितिय ग्रन्थ जुल ।

पीएचडया अनुसन्धान डा. जनकलाल सरं थः हे पुलांम्ह सहपाठी विद्वान डा. कमलप्रकाश मल्लया निर्देशनय् यानादिल । थ्व डा. वैद्यया निंतिं तःधंगु सौभाग्यया खँ खः । नेपालभाषा ख्यःया छम्ह अद्वितिय प्राज्ञिक व्यक्तित्व डा. कमलप्रकाश मल्लया कुशल निर्देशनं डा. वैद्यया अनुसन्धान कृति नेपालभाषाया ख्यलय् ज्वःमदुगु सफूकथं पिहां वल ।

डा. जनकलाल वैद्यजुं ‘खेलुइताः’ पत्रिका पिकयाः नं नेपालाभाषा ख्यलय् तःधंगु योगदान बियादीगु दु । थ्व पत्रिकालिसे जि नं शुरुनिसें हे सम्बन्धित । थ्व पत्रिका सुथां लाक्क पिकायेगुलिइ डा. जनकलाल जुया तःधिकःम्ह काय डा. विजयश्वर वैद्यं नं तःधंगु हि चःति हायेकूगु दु ।

डाक्टर ब्वनेत विदेशय् वंसां स्वन्तिया विदाय् वइबलय् न्हूदँया पर्वय् ‘खेलुइताः’ पिकायेत डा. विजयश्वरं चान्हिं ज्या याइ । अथे हे लिपा वयाः डा. जनकलाल सरया कान्छाम्ह काय राजेश्वर वैद्यं नं ‘खेलुइताः’ नियमित रुपं पिकायेत उतिकं हे कुतः याइ । अथे खे ‘खेलुइताः’ पिकायेत माःगु आर्थिक खर्च चूलाकेत जनकलाल सरया जहान मय्जुं नं उतिकं नुगः चकंकादिल । नेपालभाषाया समृद्धिया निंतिं जनकलाल सरया परिवारया नं नुगः क्वसाःगु खनेदइ ।

डा. जनकलाल सर तसकं सरल व अतिकं शालिन स्वभावया जुयाः नं वय्कलं थःगु जीवनय् ततःधंगु त्रासदीया अनुभव यायेमाल । वय्कःया माहिलाम्ह काय ज्ञानेश्वर वैद्य पुलिसय् जागिर । ल्याय्म्हचा तिनि । अविवाहित । जागिरया सिलसिलाय् ‘बाग्लुङ’ य् खटे जुइ । अन हे माघे संक्रान्तिया जात्राय् हत्या जुइ । डा. जनकलाल सरं पुत्र शोक फयेमाली । हाकनं मेगु अविश्वसनीय मार । डा. जनकलाल सरं जीवनय् फये माली ।

वय्कःया ज्येष्ठ पुत्र डा. विजयश्वर वैद्य जिं सिउकथं तसकं हे भद्र पुरुष । डा. जनकलाल सरया पीएचडी ‘थेसिस’ फुक्क टाइप विजयश्वरं याःगु । तसकं हे तप्पँगु । थौंकन्हय् डा. विजयश्वर बेलायतय् । तर छु जुल थें ! दँ दँ दत डा. विजयश्वरं डा. जनकलाल सरया परिवारलिसे स्वापू मतःगु । स्वापू शुन्य । मां मन्तं नं स्वापू मतः । थन वइ, ससलय् च्वनी । तर परिवारलिसे स्वापू तइमखु । मदुम्ह काय  दयां नं मदयेका च्वनेमाःम्ह कायया शोक डा. जनकलाल सरं थःगु जीवनया उत्तराद्र्धकालय् फये माल ।

थ्व न्यनीपिं झीत हे नं अतिकं हृदयविदारक जुइ । तर । कान्छाम्ह काय व म्ह्याय्या सेवां डा. जनकलाल सरं म्वाःतल्ले थःगु जीवनया अकल्पनीय दुःखयात ल्वःमंके फत जुइ । डा. जनकलाल सरया अवसान नेपालभाषाया प्राज्ञिक श्रीवृद्धिया निंतिं तःधंगु क्षति खः । जुइ ।

नेपालभाषाया प्राज्ञिक जगतयात थकायेगु हे वय्कःयात सही श्रद्धाञ्जली जुइ ।

सम्बन्धित बुखँ

LEAVE YOUR COMMENTS