मेक्सिकन लागू वासः तस्कर अमेरिकाय् दोषी ठहर

मेसिक्कोया लागू वासः तस्कर ख्वाकिन एल चापो गुथमानयात न्युयोर्कय् च्वंगु संघीय अदालत लागू वासः तस्करीया झिगू थीथी द्वपनय् दोषी ठहर याःगु दु । ६१ दँ दुम्ह ख्वाकिनयात कोकिन व हेरोइन तस्करी, अवैध हतियार व मनी लन्ड्रिङ्गया द्वपनय् अदालतं दोषी ठहर याःगु खः । झिंछवाः तक जूगु सुनवाई लिपा मंगलवाः अदालतं फैसला न्यंकूगु खः ।

अदालतं दोषी ठहर याःगु जूसां सजाय धाःसा न्यंकूगु मदुनि । वयात जीवंकाःछि जेलय् तयेगु सजाय न्यंकेफु धाःगु दु ।एल चापो मेसिक्कोया जेलं सुरुङ्ग दयेकाः बिसिउँ वःगु खःसा सन् २०१६ जनवरीइ वयात हाकनं ज्वंगु खः । वयात सन् २०१७य् अमेरिकायात लःल्हाःगु खः । एल चापोयात अमेरिकाय् लागू वासः तस्कर यायेगुली दकलय् अप्वः ल्हाः दुम्ह कथं कयातःगु दु ।

किसान परिवारय् बूम्ह ख्वाकिन अफिम व गाँजाया बुँइ ज्या याइम्ह खः । वं अनं हे लागू वासः तस्कर याये सयेकूगु खः।ख्वाकिन एल चापो गुथमानयात मेसिक्कोया ‘ड्रग लिडर’ धकाः नं धायेगु याः ।