ने. सं. ११४६ तछलागा चर्हे - दिला चःह्रे, भानु जयन्ती

बैंककया बारय् मिं नयाः २७ म्ह सित

बैंकक – थाइल्याण्डया राजधानी बैंककया छगू बारय् तसकं बांमलाक मिं नयाः म्होतिं नं २७ म्ह सीगु दु । आइतवाः बहनि लिबाक्क जूगु घटनाय् ख्वीम्हं मल्याक घाःपाः जूगु दु । घाःपाः जूपिंमध्ये नीन्याम्हेसिया अवस्था गम्भिर दु ।

राजधानीया लोकंह्वाःगु चतुचक जिल्लाया बार य्स्टेज लिक्कं मिं नयेगु शुरु जूगु खःसा छक्वलं मि तच्वकं न्यना वंगु खः । मि न्यना वनेवं विद्युत आपूर्ति बन्द जूगु खःसा बारया क्वथा दक्वं कुं जाःगु प्रत्यक्षदर्शीतय्सं धाःगु दु ।

थाइल्याण्डया प्रधानमन्त्री अनुटिन चार्नभिराकुलं घटनास् थलपाखें २७ म्हे सिया सीम्ह लिकाःगु व घाःपाः जूपिंत अस्पताल भर्ना याःगु धाःगु दु । स्थानीय संचार माध्यमं सीपिंमध्ये गुम्ह मिजं व १८ म्ह मिसा खः । लिसें उगु घटनाय् छुं मनूत वेपत्ता जुयाच्वंगु नं थाइ संचार माध्यमं न्ह्यथंगु दु ।

प्रधानमन्त्रीय चार्नभिराकुलं बारय् सांगीतिक ज्याझ्वः जुयाच्वंगु इलय् प्रस्तुति बियाच्वंम्ह छम्ह संगीतकारं विद्युत प्रणालीया मुख्य स्वीच लिक्क मिं नःगु धाःगु खः ।

आइतवाः चान्हसिया इलय् मिं नःगु छुं ईलिपा हे घटनास्थलय् थ्यंकः वःपिं दमकलया कर्मचारीतय्सं याकनं मि नियन्त्रणय् काये त ताःलाःगु खः । दमकलया हे कर्मचारीतय्सं आपालं सीम्ह लुइकूगु खःसा उकीमध्ये अप्वः थें सीम्ह छकू हे बाथरुमं लुइकूगु खः । सम्भवतः मिं नयेवं इपिं बचे जुइत बाथरुमय् आश्रय काः वंगु खये माः धइगु अनुमान याःगु दु ।

‘सीपिमध्ये अप्वः थें मनूत बाथरुमय् लूगु खः, मिं नःगु इलय् इपिं आते चाःगु व मत नं मदुगुलिं इमिं दक्वं छथाय् हे वंगु खये माः’, थाइल्याण्डया राष्ट्रिय प्रहरी प्रमुख कित्रात पानफे टं धाःगु दु ।

सामाजिक संजाल एक्सय् सार्वजनिक जूगु भिडियोय् बार पाखें तसकं तप्वायेक मिप्वाः पिहां वयाच्वंगु, मनूत चिल्लाय दनाः हालाः बिसिउँ वनाच्वंगु, गुलिं दःगु खने दुगु खःसा निम्हे सियाम्हय् मिं नःगु नं खनेदुगु खः ।

लाओसया छम्ह २४दँ दुम्ह काउउदोन पोङ्गप्पानीं मिखाय् ख्वबि जायेक तयाः थः चिधिकःम्ह किजायाथाय् वनेत कुतः यानागु खःसां वनेमफुगु खँ धाःगु दु । ‘जिंमि स्यायेगु उपकरणं लुखाय् छ्वाकागु खः, तर जि न्ह्यःने वने मफुत । दुने मनूत चिल्लाय् चिल्लाय् दनाः हालाच्वंगु जक न्यना’, पोङ्गप्पानीं संचार माध्यमयात धाःगु दु ।

मिं नयाः बारय् च्वंगु फर्निचर, अंगलिसें पौ पूर्णरुपं ध्वस्त जूगु दुसा मिं नःगु ‘रोङ बियर ना लाट फ्राओ’ नांया उगु बार बैंककया चातुचक जिल्लाया हे तसकं लोकंह्वाःगु बार, रेष्टुरेन्ट व मनोरञ्जनस्थल खः ।