भारत-अमेरिका दथुइ सैन्य ग्वाहालि सम्बन्धी सम्झौता

एजेन्सी – चीनलिसे तच्वःगु सीमा विवादया दथुइ भारत व अमेरिकां भूउपग्रहपाखें चूलाइगु सम्वेदनशील डाटाया जानकारी बीगु सम्बन्धी सैन्य सम्झौता जूगु दु । थ्व डाटाया ग्वाहालिं क्षेप्यास्त्र, ड्रोन लिसें मेमेगु सम्वेदनशील थासय् सही निशाना यायेफइगु खँ धाःगु दु ।

दिल्लीइ जूगु टु प्लस टु उच्चस्तरीय वार्ताया दथुइ थ्व सम्झौताया घोषणा जूगु खः । अमेरिकी विदेशमन्त्री माइक पोम्पेओ व रक्षामन्त्री मार्क एस्परं भारतया विदेशमन्त्री एस जयशंकर व रक्षामन्त्री राजनाथ सिंहलिसे नापलासें थ्व सम्झौता याःगु खः । बेसिक एक्सचेञ्ज एण्ड कोअपरेशन एग्रिमेन्ट अन जियोस्पाचियल कोअपरेशन (बेका) सम्झौता अन्तर्गत भारतयात सैन्य विकल्पय् ग्वाहालि यायेत माःगु सम्वेदनशील जियोस्पाचियल व एअरोनटिकल डेटा अमेरिकां उपलब्ध यानाबी । थुकिया लिसें निगू देय् दथुइ परमाणु, ऊर्जा, भूविज्ञान व वैकल्पिक औषधोपचारसम्बन्धी मेगु सम्झौता नं जूगु दु । तर दकलय् महत्वपूर्ण बेका सम्झौता हे खः ।

थ्व सम्झौता अन्तर्गत अमेरिकां भारतयात बीगु सैन्य विमानय् नेभिगेशन व एभियोनिक्स सम्बन्धी अत्याधुनिक सुविधा तयाबीगु खँ भारतीय रक्षा सुत्रं समाचार एजेन्सी रोयटर्सयात धाःगु दु । भारत व चीन दथुइ सीमा विवाद जुयाच्वंगु इलय् अमेरिकालिसे भारतं याःगु थ्व सम्झौतायात तसकं अर्थपूर्ण रुपं कयाच्वंगु दु । थ्व सम्झौता चीनयात थासय् तयेगु निंतिं जूगु विज्ञतय्गु धापू दु । चीनं नं सीमा विवाद जुइधुंकाः भारतया झुकाव अमेरिकापाखे तच्वया वनाच्वंगु खँ धयावयाच्वंगु दु ।