टेलिकमया प्रिपेडय् नं रोमिङ सेवा

येँ – नेपाल टेलिकमं प्रिपेड मोबाइलय् नं रोमिङ सेवा बीगु जूगु दु । न्हापा पोस्टपेड मोबाइलय् जक बिया वयाच्वंगु थ्व सेवा आः प्रिपेडय् नं बीत्यंगु खः । आःयात देशं पिने भारत व चीनया् प्रिपेड रोमिङ सेवा बी । टेलिकमं आउट वाउण्ड रोमिङ सेवा सुरु याःगु खः । याकनं हे मेमेगु देशय् वनीपिं नेपालीतय् निंतिं नं थःगु देय्या हे मोबाइलपाखें थःथितिपिंलिसे खँ ल्हायेगु खनी खँ टेलिकमं धाःगु दु ।

प्रिपेड सेवा कयातःपिंसं नं धरौटी मतसे हे थ्व सुविधा कायेखनी । मोबाइलय् दुगु ब्यालेन्सया आधारय् फोन यायेदइगु खँ धाःगु दु ।
थ्वयां न्ह्यव पोष्टपेड सेवा कयातःपिं ग्राहकतय्सं झिद्वः तका धरौटी तयाः रोमिङ्ग सेवा कया वयाच्वंगु खः । टेलिकमया प्रबन्ध निर्देशक डिल्लीराम अधिकारीं सेवा व सुविधायात थप विविधीकरण यानायंकेगु सोच कथं न्हून्हूगु योजना हयाच्वनागु खँ कनादिल ।

अथेहे टेलिकमं जिएसएम पोष्टपेड ग्राहकतय्त गुसः तकाः लछिया निगू जिबी डाटा उपलब्ध याकीगु नं जूगु दु । थुकीया लिसें टेलिकमं थीथी प्याकेज नं हःगु दु । टेलिकमं वंगु आर्थिक दँ २०७४÷७५ य् २७ करोड तका नाफा याःगु दु । टकम्पनीया खुद नाफा १३.७३ प्रतिशतं अप्वया आर्थिक दँ २०७४÷७५ य् १७ अर्ब ४८ करोड थ्यंगु दुसा कम्पनीया प्रतिशेयर आम्दानी नं थहां वनाः ११६.५६ प्रतिशत थ्यंगु दु ।